Mamyr aıynda jasalǵan qylmystyń 2 myńǵa jýyǵy izi sýymaı ashyldy - ІІM
ASTANA. 11 mamyr. QazAqparat /Jasulan Amanbaıuly/ - Mamyr aıynyń birinshi onkúndiginde barlyǵy 3572 qylmys tirkeldi, onyń ishinde 1951 qylmys nemese 55 paıyzy ashylǵan.
Bul málimetterdi búgin Astanada ótken baspasóz máslıhaty barysynda QR ІІM-niń Ákimshilik polıtsııa komıtetiniń tóraǵasy Qaırat Tynybekov keltirdi.
Onyń aıtýynsha, jasalǵan qylmystardyń jalpy sanynyń 50% astamyn (1797) urlyqtar quraıdy. Kósheler men qoǵamdyq oryndarda 435 qylmys áreketi anyqtalǵan.
Onkúndikte elimizdiń aýmaǵynda 47 kisi óltirý faktisi tirkelip, onyń 42-si ashyldy. Esirtkiniń zańsyz aınalymyna baılanysty 49 qylmys anyqtaldy, onyń ishinde 18 fakti esirtki satý. Sonymen qatar osy ýaqyt aralyǵynda avtokólikterdi urlaý men aıdap ketýdiń 78 faktisi tirkelgen, onyń ishinde 39 fakti ashylmaǵan.
«Aǵymdaǵy jylǵy mamyrda ótkizilgen jedel-izdestirý is-sharalarynyń nátıjesinde jalpy respýblıka boıynsha buryn jasalǵan 495 qylmys ashyldy, onyń ishinde 9 - kisi óltirý, 11 - qaraqshylyq, 65 - tonaý, 335 - urlyq jáne 9 - avtokólik aıdap áketý. Buryndary qylmys jasaǵan 54 qylmysker tabyldy»,-deıdi Q. Tynybekov.
