Mamyr aıynda tutynýshylardyń seziný ındeksi 1 paıyzdyq tarmaqqa ósti - Statıstıka
ASTANA. 11 maýsym. QazAqparat - Qazaqstanda «Tutynýshylardyń seziný ındeksi» 2013 jylǵy mamyrda ótken aımen salystyrǵanda 1 paıyzdyq tarmaqqa (+18%) ósti. Bul týraly Statıstıka agenttiginiń baspasóz qyzmetinen habarlandy.
Agenttik málimetterine qaraǵanda, saýalnamaǵa sáıkes, 2013 jylǵy mamyrda respondentterdiń 32 paıyzy sońǵy 12 aı ishinde elimizdegi ekonomıkalyq jaǵdaıdyń jaqsarǵanyn atap ótken. Al suralýshylardyń 14 paıyzy osy ýaqyt aralyǵynda jaǵdaıdyń nasharlaǵanyn habarlaǵan.
Budan bólek, elimizdegi «Ekonomıkalyq ahýal ındeksi» ótken aımen salystyrǵanda ózgermedi jáne +18%-dy qurady. Respondentterdiń 31 paıyzy aldaǵy 12 aıda eldegi jalpy ekonomıkalyq jaǵdaıdyń odan ári jaqsaratynyn kútse, al 13%-y jaǵdaıdyń nasharlaýy múmkin dep eseptegen.
Sonymen qatar, «Satyp alý nıetiniń ındeksi» ótken aımen salystyrǵanda 2 paıyzdyq tarmaqqa ósip, +19% qurady. 2013 jylǵy mamyrda respondentterdiń 33%-y jeke úı sharýashylyǵyndaǵy qarjy jaǵdaıynyń jaqsarǵanyn aıtsa, 14%-y óz úı sharýashylyǵyndaǵy qarjy-ekonomıkalyq jaǵdaıdyń nasharlaǵanyn atap ótken.
Jalpy, suralǵandardyń 15%-nyń pikiri boıynsha elimizdegi jumyssyzdyq deńgeıine qatysty ahýal aldymyzdaǵy 12 aıdyń ishinde jaqsarady. Degenmen, suralǵandardyń 11%-y oǵan qarama-qarsy pikirdi ustanady. Aldymyzdaǵy 12 aıdyń ishinde úı sharýashylyǵyndaǵy aqshalaı qorlanym somasynyń ósý múmkindigin suralǵan tutynýshylardyń 20%-y atap ótse, 21%-y onyń kemıtinin aıtqan.
