Mamyr aıynda temir jol kólikteriniń astyna túsip, úsh adam mert boldy - «Lokomotıv» AQ
ASTANA. 27 mamyr. QazAqparat /Gúlmıra Álıakparova/ - Aǵymdaǵy jyldyń mamyr aıynda Qazaqstannyń temir joldarynda adamdardyń qatysýymen toǵyz oqıǵa oryn aldy,
onyń úsheýi qaıǵyly aıaqtaldy. Bul týraly «Lokomotıv» AQ-nyń baspasóz qyzmetinen habarlady.
Sondaı-aq kompanııanyń málimetterine súıensek, temir jol ótkelderinde avtokóliktermen soqtyǵysýdyń - úsh, malmen soqtyǵysýdyń úsh oqıǵasy boldy. Olardyń negizgi sebepteri - temir joldardyń boıymen belgilenbegen jerden ótý. Mysalǵa, 23 mamyr kúni Túlkibas-Arys ýchaskisinde poıyz temir joldardyń boıyna kenetten atyp shyqqan adamdy qaǵyp ketti. Berilgen dabyldarǵa qaramastan, ol bolat joldardyń qaq ortasyna turyp alǵan. Mashınıst poıyz jyldamdyǵyn shuǵyl túrde tejegenimen, ara qashyqtyqtyń az bolýy saldarynan soqtyǵysýdyń aldyn alýǵa múmkin bolmady.
Osy kúni avtokólikpen eki soqtyǵysý oqıǵasy oryn aldy. Birinshisi, kúzetke alynbaǵan temir jol ótkeli - Almaty-Saryózek ýchaskisinde tirkeldi. Qozǵalyp kele jatqan lokomotıvke 25 metr qalǵanda «Nıssan» kóligi bolat joldarǵa shyǵyp ketken. Teplovozdyń mashınısi jyldamdyqty dereý tejegenimen, soqtyǵysýdy boldyrmaý múmkin bolmady. Jolda júrý erejelerin buzǵan 23 jastaǵy áskerı qyzmetker oqıǵa ornynda kóz jumdy.
Ekinshi oqıǵa da qaıǵyly aıaqtaldy. Býrabaı-Novoıshımka ýchaskisindegi temir jol ótkelinde «Mersedes» kóligi jolǵa shyǵyp ketip, soqtyǵysqan.
«Lokomotıv» AQ-nyń birinshi vıtse-prezıdenti Qazezqan Jumataevtyń pikirinshe, oryn alǵan qaıǵyly oqıǵalardyń jolda júrýdiń qarapaıym erejelerin saqtaý arqyly aldyn alýǵa bolýshy edi.
«Taldaý nátıjesi, adamı faktorlar áli de basty sebepshi bolyp otyrǵanyn kórsetti. Ýchaskilerge jaýapty qyzmetkerler ózderiniń jaýapkershilikterine, jol qaýipsizdigin saqtaý máselelerine ústirt qaraıdy. Tipti joǵary bilikti, ári eńbek ótili joǵary mashınıster ondaı oqıǵalardyń aldyn ala almaı qalady. Osyǵan oraı biz, soqtyǵysýdy boldyrmaý úshin ýaqytyly shara qoldanbaǵan lokomotıvti brıgadalarǵa qatań shara qoldanýdy uıǵaryp otyrmyz, tipti eńbek shartyn buzýǵa deıin jazalar qoldanylmaq», - dep atap ótti ol.
