Mamyr aıynda Qazaqstandaǵy resmı avtokólik dıllerleriniń satylymy ulǵaıdy
ALMATY. Maýsymnyń 17-si. QazAqparat /Erbol Azanbek/- Mamyr aıynda Qazaqstandaǵy resmı dıllerlerdiń avtokólik satylymy ulǵaıǵany baıqaldy,
dep habarlaıdy QazAqparat «Qncepto» konsaltıngtik kompanııasyna silteme jasap.
Ótken aıda qazaqstandyq resmı dıllerler 1 549 jeńil jáne kommertsııalyq avtokólikter satqan. «Qncepto» kompanııasynyń zertteýlerine sáıkes, bul 2009 jyldyń uqsas merzimimen salystyrǵanda 6,24 paıyzǵa joǵary. Sondaı-aq ótken aıda satylǵan avtokólikter sany sáýir aıyndaǵy satylymnan 20, 54 paıyzǵa joǵary bolǵan. «Qncepto» konsaltıngtik kompanııasynyń zertteýleri kórsetkendeı, ótken aıda Lada, Toyota, Lexus, KIA avtokólikterine suranys joǵary bolǵan. Bul kólikterdiń kóshin «Lada» bastap keledi. Ótken aıda bul markanyń 365-i satylǵan. Al ótken aıda ǵana Almatyda resmı ortalyǵyn ashqan Lexus kólikteriniń 47-i satylǵan. Sarapshylardyń aıtýynsha, bunymen Lexus alǵashqy aıdyń ózinde-aq joǵary kórsetkish kórsetip otyr.
«Qncepto» zertteýleri kórsetkendeı, elimizde reseılik, ózbekstandyq jáne otandyq avtokólikterge suranys joǵary. Máselen, alǵashqy toqsanda ózbekstandyq Daewoo Nexia kóliginiń 127-i satylsa, Reseıdiń Tolıattı zaýytynda qurastyrylǵan "jetiliktiń" 118-i, Óskemende qurastyrylǵan Lada 4x4-tiń 112 danasy satylǵan. Bul basqa brenderden anaǵurlym joǵary kórsetkish.
