Mamyr aıynda iskerlik belsendilik ındeksi birshama tómendedi – Ulttyq bank

NUR-SULTAN. QazAqparat - Mamyrda iskerlik belsendilik ındeksi 49,0 (sáýirde – 49,5) bolyp, birshama tómendedi. Alaıda, ekonomıka geosaıası jaǵdaıdyń jáne onymen baılanysty saldardyń yqpalynda bolǵan naýryzdaǵy deńgeıden (48,2) ındeks joǵary qalyptasty.

QR Ulttyq bankiniń aqsha-kredıt saıasaty departamentiniń dırektory Rústem Orazalın osyndaı málimet keltirdi, dep habarlaıdy QazAqparat.

Іskerlik belsendiliktiń ósýi óndiris sektorynda baıqaldy: ındeks 50,9-ǵa deıin kóterildi (sáýirde – 50,5). Qyzmet kórsetý sektorynda jáne taý-ken óndirý ónerkásibinde iskerlik belsendilik, tıisinshe, 48,8-ge jáne 48,3-ke deıin tómendedi. Qurylysta ındeks 44,6-dan 46,2-ge deıin kóterildi.

Barlyq sektorda jetkizilim merzimderi uzarǵany baıqalady, qurylysta jumyspen qamtý jaǵdaıy azdap jaqsardy, biraq tapsyrys kólemi tómen deńgeıde qalyp otyr.

2022 jylǵy mamyrda kásiporyndardyń aǵymdaǵy bıznes-jaǵdaılardy baǵalaýy ózgerissiz qaldy. Teris ózgeristerdi atap ótken respondentter sany burynǵysynsha basym.

Alaıda, kásiporyndardyń bolashaq bıznes-jaǵdaılaryna qatysty senimi aıtarlyqtaı jaqsardy (keleshek jaǵdaılardy baǵalaý bıylǵy sáýirdegi 7,3-ten 22,5-ke deıin ulǵaıdy).

«Nátıjesinde aǵymdaǵy jáne bolashaq bıznes-jaǵdaılardy ortasha baǵalaýdy bildiretin bıznes-ahýal ındeksi bıznesti júrgizýdiń bolashaq jaǵdaılaryna qatysty, ásirese, qurylys salasyndaǵy kásiporyndarda optımızmdi jaqsartý esebinen 9,2 (sáýirde – 2,2) qurap, aıtarlyqtaı jaqsardy»,-delingen habarlamada.