Mamyr aıynda ınflıatsııa kórsetkishi 0, 6 paıyzdy qurady
ALMATY. Maýsymnyń 2-si. QazAqparat /Erbol Azanbek/ - QR Statıstıka agenttiginiń resmı derekteri boıynsha, mamyr aıynda ınflıatsııa kórsetkishi 0, 6 paıyzdy qurady. Bul týraly búgin Almatyda QR Ulttyq Banktiń tóraǵasy Grıgorıı Marchenko aıtty,
dep habarlaıdy QazAqparat.
Bas bankırdiń aıtýynsha, mamyr aıynda azyq-túlik taýarlarynyń baǵasy 0,7 paıyzǵa, azyq-túlikke jatpaıtyn taýarlar 0,5 paıyzǵa jáne aqyly qyzmet kórsetý 0,4 paıyzǵa ósken. Azyq-túlik taýarlary naryǵynda ótken aıda joǵary ósim kórsetken jemis-kókónis ónimi 2,7 paıyz, et ónimderi 1,5 paıyzǵa qymbattaǵan. Al jumyrtqa baǵasy kerisinshe 2,8 paıyzǵa, sút 1,5 paıyzǵa kúrish 1,2 paıyzǵa, un 1, 1 paıyzǵa tómendeýi baıqaldy.
Azyq-túlikke jatpaıtyn taýarlar tobynda kóbinese, jýý jáne tazalaý quraldarynyń baǵasy 0,9 paıyzǵa, jeke gıgıena taýarlary 0, 7 paıyzǵa, úı zattary, kıim jáne aıaq kıim 0,5 paıyzǵa, dári-dármekter 0, 4 paıyzǵa ósken. Dızel otynynyń baǵasy 2,6 paıyzǵa , benzın 2,2% paıyzǵa artqan.
Turǵyn úı-kommýnaldyq qyzmet kórsetý salasynda sýyq sýǵa arnalǵan tarıfter 0,9 paıyz, elektr energııasy 0,5 paıyzǵa ulǵaıdy. Budan basqa, kólik qyzmeti 1,5 paıyzǵa, densaýlyq saqtaý 0,9 paıyzǵa, demalys, oıyn-saýyq jáne mádenıet 0,5 paıyzǵa, meıramhanalar jáne qonaqúıler qyzmetiniń 0,3 paıyzǵa qymbattaýy baıqaldy.
Jalpy 2010 jylǵy qańtar - mamyrda ınflıatsııa 4, 2 paıyz deńgeıinde qalyptasqan. 2010 jylǵy 5 aıdaǵy ınflıatsııanyń jedel qarqyndaýy azyq-túlik taýarlarynyń 5, 5 paıyzǵa jáne aqyly qyzmet kórsetýdiń 4, 5 paıyzǵa qymbattaýyna sebepshi boldy. Azyq-túlikke jatpaıtyn taýarlar 2, 1 paıyzǵa qymbattady.
Mamyr aıynyń qorytyndysy boıynsha jyldyq kórsetkish boıynsha ınflıatsııa 7 paıyzdy quraǵan. «Ózderińiz biletindeı ınflıatsııanyń jyldyq boljamy 6 - 8 paıyzdy quraıdy. Qazir ınflıatsııa osy boljamdyq kórsetkishtiń aralyǵynda», dedi G.Marchenko. Onyń aıtýynsha, jalpy alǵanda azyq-túlik baǵasy 5, 2 paıyzǵa, azyq-túlikke jatpaıtyn taýarlar 6, 4 paıyzǵa, aqyly qyzmet kórsetý 10, 1 paıyzǵa ósken.
