Mamyr aıynda halyqtyń ortasha aqshalaı tabystary 11,4 paıyzǵa artty
ASTANA. 12 shilde. QazAqparat /Qanat Mámetqazyuly/ - 2011 jylǵy mamyr aıynda halyqtyń ortasha jan basyna shaqqandaǵy ataýly aqshalaı tabystary aldyn ala berilgen derekter boıynsha 43316 teńgeni qurady.
Bul 2010 jylǵy tıisti kezeńmen salystyrǵanda, 11,4 paıyzǵa artyq kórsetkish. Al halyqtyń naqty aqshalaı tabystary 2,9 paıyzǵa ósken. Bul týraly QR Statıstıka agenttiginen habarlandy.
Agenttiktiń málimetterine qaraǵanda, 2011 jylǵy mamyrda ortasha jan basyna shaqqandaǵy aqshalaı tabystardyń kólemi boıynsha Atyraý oblysy, Almaty jáne Astana qalalary aldyńǵy qatarda tur. Bul óńirlerdegi kórsetkish ortasha respýblıkalyq deńgeıden 2,5-1,8 esege artqan. Sonymen birge, 2011 jylǵy mamyrda tabystary eń tómen óńirler qatarynda Ońtústik Qazaqstan, Jambyl jáne Almaty oblystary tur. Atalǵan óńirlerde halyqtyń tabys mólsheri respýblıkalyq deńgeıden ortasha alǵanda 60,8 paıyz jáne 70,7 paıyzdy qurady. Sonymen birge, halyqtyń naqty aqshalaı tabystarynyń eń kóp ósý qarqyny Soltústik Qazaqstan jáne Atyraý oblystarynda tirkelgen.
2011 jylǵy mamyrda óńirler boıynsha ataýly aqshalaı tabystardyń eń joǵary jáne eń tómen mólsherleri arasyndaǵy araqatynas 4,0 eseni qurady. Ótken 2010 jylǵy mamyrda bul kórsetkish 3,6 eseni quraǵan bolatyn.
