Mamyr aıynda elordada koronavırýstyń taralýy báseńdeıdi– boljam
NUR-SULTAN. QazAqparat – Mamyr aıynda elordada koronavırýs ınfektsııasy báseńdeýi yqtımal, dep habarlaıdy QazAqparat tilshisi.
«Elordada jaǵdaı turaqtalyp keledi. Máselen keıingi eki kúnde aıtarlyqtaı juqtyrǵandar az tirkeldi. Bul aldyn alý jumystarynyń arqasy desek bolady. Qazir qalda azamattardy ekspres-testterden ótkizip jatyrmyz. Eger juqtyrǵandar anyqtalyp jatsa – ol durys. ıAǵnı, aldyn alý jumystaryn da bul jaǵdaıda tezirek júrgize alamyz», - dedi Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova Densaýlyq saqtaý mınıstrliginiń Facebook-tegi paraqshasynda bergen suhbatynda.
Basqarma basshysynyń aıtýynsha mamyr aıynda elordada koronavırýs ınfektsııasy báseńdeýi yqtımal.
«Keıingi táýlikte juqtyrý boıynsha ósim 2,6 paıyzdyq deńgeıde boldy. Aýqymdy jumys júrgizilip jatyr. Koronavırýs ınfektsııasy báseńdep, azamattarymyz tezirek qalypty ómirge qaıtyp keler degen úmittemiz», - dedi ol.
