Mamyr aıynda elimizdegi bir qyzmetkerdiń ortasha jalaqysy 84 myń 116 teńge qurady
ASTANA. 11 shilde. QazAqparat /Qanat Mámetqazyuly/ - 2011 jylǵy mamyrdaǵy bir qyzmetkerdiń ortasha aılyq jalaqysy 84116 teńgeni qurady.
Bul ótken jylǵy tıisti aımen salystyrǵanda 12,5 paıyzǵa, naqty kóriniste 3,8 paıyzǵa artyq kórsetkish.
Statıstıka agenttiginiń habarlaýynsha, salalyq qurylymda jalaqynyń eń úlken mólsheri qarjy jáne saqtandyrý qyzmetinde bolyp otyr. Atalǵan salalardaǵy kórsetkish 190,6 myń teńgeni quraıdy. Bul ortasha respýblıkalyq deńgeıden 2,3 esege artyq. Al kásibı, ǵylymı jáne tehnıkalyq qyzmettegi jalaqy mólsheri - 161,7 myń teńge (1,9 ese), ken óndirý ónerkásibi jáne karerlerdi qazýda 159,1 myń teńgege (1,9 ese) bolǵan. Eń tómengi jalaqy aýyl sharýashylyǵynda, orman jáne balyq sharýashylyǵyndaǵy qyzmetkerlerde saqtalýda. Bul kórsetkish 44,2 myń teńge bolyp tabylady jáne el boıynsha orta kórsetkishke qaraǵanda 47,4 paıyzǵa tómen.
Al óńirlik bóliniste eń joǵary jalaqy Atyraý oblysynda - 165,4 myń teńgeni quraıdy. Bul ortasha respýblıkalyq kórsetkishten 2,0 esege asady. Al Jambyl oblysyndaǵy kórsetkish 55,4 myń teńgeni qurady, bul el boıynsha ortasha deńgeıden 34,1 paıyzǵa tómen.
