Mamyr aıynda astanalyqtar MÁMS úshin 6,8 mlrd teńgege jýyq jarna aýdardy
ASTANA. QazAqparat - «Astana qalasy boıynsha 2023 jyldyń mamyr aıynda MÁMS úshin 6,8 mlrd teńgege jýyq jarna aýdarylǵan. Al, jyl basynan beri, ıaǵnı 2023 jyldyń qańtar-mamyr aılary aralyǵynda elordalyqtardan medıtsınalyq saqtandyrý úshin túsken jalpy soma 32,5 mlrd teńgeni quraıdy» – dep habarlaıdy Áleýmettik medıtsınalyq saqtandyrý qorynyń elorda fılıaly.
«Astana qalasy boıynsha osy jyldyń mamyr aıynda MÁMS úshin elordalyqtar 6,8 mlrd teńgege jýyq jarna aýdarǵan. Onyń ishinde 3,8 mlrd teńge – jumys berýshilerdiń, 3 mlrd teńgege jýyǵy – jeke kásipkerlerdiń aýdarymdary. Biryńǵaı jıyntyq tólem (BJT) júrgizetin 8090 tóleýshiden 12,4 mln. teńge túsken.
Mindetti áleýmettik medıtsınalyq saqtandyrý úshin túsken barlyq jarna aýdarymdary,ıaǵnı jınaqtalǵan qarjy, senimgerlik basqarý týraly jasalǵan kelisimshartqa sáıkes, Ulttyq bankte saqtalady da, medıtsınalyq qyzmetter aqysyn tóleýge jumsalady. TMKKK jáne MÁMS paketteri boıynsha halyqqa kórsetilgen medıtsınalyq qyzmetterdiń sapasy men kólemine monıtorıng jasap, teksergennen keıin ǵana Qor jetkizýshilerine tólem júrgiziledi», - deıdi «Áleýmettik medıtsınalyq saqtandyrý qory» KEAQ Astana qalasy boıynsha fılıaly dırektorynyń orynbasary Sandýǵash Bolysbekova.
Esterińizge salaıyq, 2022 jyldyń 5 qyrkúıeginen bastap bir jylǵa aldyn ala jarna tóleý arqyly MÁMS júıesine qatysýdyń jańa tetigi iske qosyldy. Ony «saqtandyrylǵan» mártebesi bar, sondaı-aq júıege eshqashan tólem jasamaǵan nemese júıesiz tólem jasaǵan barlyq derbes tóleýshiler paıdalana alady.
Buǵan deıin medıtsınalyq saqtandyrýǵa jarnalardy eshqashan tólemegen nemese júıeli túrde tólemegen, sonyń saldarynan saqtandyrý mártebesinen aıyrylǵan derbes tóleýshilerge ony qalpyna keltirý úshin ótkizip alǵan aılar úshin, tipti ótken jylǵa da jarnalardy tóleý qajet edi. Endi olarda balama ádis paıda boldy – jarna aýdarylmaǵan ótken kezeńdi tólemeı-aq, aldaǵy 12 aı úshin tólem jasaý arqyly «saqtandyrylǵan» mártebesin ala alady.
