Mamyr aıynda altyn quımalardy qaı óńir turǵyndary kóp satyp aldy
Mamyr aıynda altyn quımalardyń eń kóp kólemi myna óńirlerge satyldy:
- Almaty (2 223 dana),
- Shymkent (582 dana),
- Qaraǵandy (341 dana),
- Astana qalasy (272 dana),
- Pavlodar oblysy (106 dana).
Málimetke sáıkes, altyn quımalar 5 túrli salmaqta usynylady: 5, 10, 20, 50 jáne 100 gramm. Satyp alýshylar arasynda 10 gramdyq altyn quımalar óte joǵary suranysqa ıe. Jalpy satylǵan quımalar arasynda onyń úlesi 26% – 33 869 dana. Odan keıin 5 gramdyq altyn quımalar – 29 486 dana (23%), 100 gramdyq quımalar – 26 753 dana (21%), 20 gramdyq quımalar – 24 033 dana (18%) jáne 50 grammdyq quımalar – 15 464 dana (12%).
«Halyqqa tazartylǵan altyn quımalardy satý jáne satyp alý baǵdarlamasyn Ulttyq bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 4,4 tonna 129 605 altyn quıma satyldy», - delingen UB aqparatynda.
Aıta keteıik, altyn quımalar senimdi ınvestıtsııa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady.
«Baǵdarlama bastalǵannan beri ekinshi deńgeıli bankter men jekelegen banktik emes pýnkter jalpy salmaǵy 586,4 keli 22 553 altyn quımany keri satyp alǵan, bul – jalpy satylǵan altyn quımalardyń 17%. Keri satyp alynǵan altyn quımalardyń barlyǵy derlik Ulttyq banktiń fılıaldary arqyly halyqqa satylady.
Árbir quıma qorǵaý elementterimen qaptalǵan (quımanyń aına beti, mıkrotekst jáne jıegi bar) jáne arnaıy qorapqa salynyp shyǵady, sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap, sondaı-aq sapa sertıfıkaty bolyp sanalady. Sondyqtan, altyn quımany uqypty saqtap, qorabyn búldirmeýge keńes beremiz.
Qazir altyn quımalardy Halyk Bank, Eýrazııalyq Bank, Jusan Bank, TsentrKredıt Banki, sondaı-aq jekelegen banktik emes pýnkterden satyp alyp, keri satýǵa bolady», - delingen UB málimetinde.
