Mamyr aıynan bastap Qazaqstandyq ulttyq dárilik formýlıar qoldanyla bastaıdy
Vıtse-mınıstrdiń aıtýynsha, Qazaqstandyq ulttyq dárilik formýlıar patsıentterdi emdeý nátıjelerin jaqsartý jáne densaýlyq saqtaý salasy qyzmetkerlerine dárilik zattar týraly ózekti, tolyqqandy, shynaıy aqparatqa qoljetimdilikti qamtamasyz etý maqsatynda jasalǵan. Osyǵan baılanysty Ulttyq formýlıar mamyr aıynan bastap memlekettik jáne orys tilderinde www.knf.kz siltemesi arqyly jumys isteıtin bolady.
«Qazirgi tańda Qazaqstandyq ulttyq formýlar quramyna 644 halyqaralyq patenttelmegen dárilik zattardyń ataýy men klınıkalyq tıimdiligi dáleldengen 2 myńǵa jýyq saýda ataýlary kiredi. Ony jasaý barysynda eń úzdik halyqaralyq tájirıbe, farmakoterapııany júrgizýdiń dáleldi negizdelgen tásilderi, klınıkalyq jáne ekonomıkalyq tıimdi, qaýipsiz dárilik zattardy tutyný dárejesin zertteý málimetteri, árbir aýrýdy emdeý kýrsynyń baǵasy týraly aqparat qoldanyldy», - dedi A. Tsoı.
Mınıstrlik ulttyq formýlar quramyna engen dárilik zattardyń tizimin turaqty túrde jańartyp otyratyn bolady. Bul dárilik zattardy taǵaıyndaıtyn dárigerlerge jańa tirkelgen medıtsınalyq preparattar týraly, olardyń keri áseri jaıynda aqparatty ýaqytyly alýǵa, dárilerdiń mólsherlemesin belgileý boıynsha sheshimderin rastaýǵa, tıimdi emdeý kýrsyn taǵaıyndaýǵa kómektesedi.
Jalpy alǵanda Qazaqstandyq ulttyq formýlıardy ázirleýge Dúnıejúzilik Bank sarapshylary, Eýropa men Jańa Zelandııadan kelgen halyqaralyq keńesshiler, sonymen qatar, álemde úzdik bolyp sanalatyn Brıtandyq ulttyq dárilik formýlıardy jasaǵan Dýnkan Enraıt qatysqan. Onyń pikirinshe, Qazaqstandyq ulttyq formýlar - azamattardy emdeý nátıjelerin jaqsartýmen qatar, dárilik zattardy barynsha tıimdi satyp alý arqyly bıýdjettik qarajatty únemdeýge múmkindik beretin biregeı joba.