Mamyr aıynan bastap «Qara kıimdiler» qazaqsha sóıleıdi
ASTANA. 24 sáýir. QazAqparat - Internette tanymal «Qara kıimdiler ІІІ» blogbasteriniń qazaqtildi treıleri shyqty, dep habarlaıdy «Bolashaq» Qaýymdastyǵynyń baspasóz qyzmetine silteme jasaǵan BNews.kz saıty.
2012 jyldyń 2 sáýirinde Almaty qalasyndaǵy Cinema Tone Production stýdııasynda Sony Pictures kompanııasynyń «Men in Black ІІІ» fılminiń úshinshi bólimin qazaq tiline dýblıajdaý jumysy bastalǵan bolatyn. Jańa fılmniń qazaqsha ataýy - «Qara kıimdiler 3». Qazaqstanda fılm qazaq jáne orys tilderinde 24 mamyr kúni kórsetile bastaıdy.
«Qara kıimdiler III» - Sony Pictures stýdııasynyń kınoteatrlarda kórsetilip, Blu-Ray jáne DVD dıskterinde taratylýy úshin qazaq tiline dýblıajdanǵan alǵashqy fılm bolmaq. Avtordyń túpki oıyn dál jetkizý úshin fılmniń mátini aǵylshyn tilinen tikeleı qazaq tiline aýdaryldy.
Dıalogtardy beıimdeý jumysyn Linguaserve kompanııasynyń mamandary atqardy. Jobanyń Bas demeýshisi - «Samuryq-Qazyna» qory.
Naýryz aıynyń ekinshi jartysynda Almaty qalasynda daýys synaqtary ótkizildi. «Qara kıimdiler III» fılminiń bas keıipkerlerin dybystaıtyn ártisterdi Sony Pictures kompanııasynyń Qazaqstanǵa arnaıy kelgen qyzmetkerleri bekitti. Dybysty álemdik standarttarǵa sáıkes montajdaý úshin jazylǵan materıal London qalasyndaǵy Shepperton stýdııasyna jiberiledi.
«Ýıll Smıttiń jyldam sóıleý mánerine shamasy keletin ártisti tabý qıyndyqqa soqty. Kóptegen synaqtardan keıin Sony Pictures ókilderi fılmniń bas keıipkerin dybystaý úshin Azamat Qanapııaevti tańdady. Bul mindetti tamasha oryndaı bilgen tek sol ǵana boldy», - dep moıyndap otyr uıymdastyrýshylar.
Synaqtan, sonymen qatar, Nyshanbek Jubanaev, Sáýle Týrdahýnova jáne basqa ártister ótti. Qazaq dýblıajynyń rejısseri - "A-ǵa oralý", "Júregim meniń - Astana" týyndylarymen jumys istegen Áıgerim Ońalbek.
Esterińizge sala keteıik, Gollıvýdttyq fılmderdi qazaq tiline kórkemdik dýblıajdaý jobasyna 2011 jyly Walt Disney stýdııasynyń "Kólikter 2" mýltfılmi bastama boldy. Jobany júzege asyrǵan - «Bolashaq» Qaýymdastyǵy, «Meloman» kompanııasy. «Altyn Qyran» halyqaralyq qaıyrymdylyq qory demeýshilik kómek kórsetti.
«Qara kıimdiler III» - 2012 jyly asa kútiletin premeralardyń biri, Jerdegi ózge ǵalamsharlyqtardyń qyzmetin retteıtin qupııa uıymnyń qyzmetkerleri týraly kassalyq fılmderdiń jalǵasy. Ekinshi fılm osydan on jyl buryn shyqqandyqqan, barlyq álem kórermenderiniń Ýıll Smıt pen Tommı Lı Djonstyń keıipkerlerin saǵynyp úlgergenine kúmán joq. Komedııa janrynda túsirilgen bul fılm dostyq, batyldyq, ózara qoldaý kórsetý jáne adaldyq sekildi máńgilik qundylyqtardy nasıhattaıdy.
