MÁMS júıesinen tys qalǵan 3,3 mln adamnyń máselesi qashan sheshiledi
ASTANA. KAZINFORM – MÁMS júıesinen tys qalǵan 3,3 mln adamnyń máselesi qashan jáne qalaı tolyq sheshiledi? Bul suraqqa Densaýlyq saqtaý mınıstrligi jaýap berdi.
«Bıýdjettiń múmkindigi men mindettemesin eskere otyryp, memleket kepildik beretin medıtsınalyq kómektiń Biryńǵaı bazalyq paketin jasaý tapsyryldy. Osyǵan baılanysty medıtsınalyq kómektiń Biryńǵaı paketin qalyptastyrý, medıtsınalyq saqtandyrý júıesiniń qarjylyq turaqtylyǵyn qamtamasyz etý jáne halyqtyń neǵurlym áleýmettik osal toptarynyń jekelegen sanattary úshin mindetti medıtsınalyq saqtandyrý júıesine saqtandyrý tólemderin jasaý jergilikti atqarýshy organdarǵa jaýapkershilik júkteý boıynsha Mınıstrlik jumys atqardy. Memleket basshysynyń tapsyrmasyn iske asyrý aıasynda Densaýlyq saqtaý mınıstrligi mańyzdy normalardy retteıtin «Qazaqstan Respýblıkasynyń keıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» zań jobasyn ázirledi. Normalardyń biri - halyqty MÁMS júıesimen qamtýdy keńeıtýge, atap aıtqanda, jergilikti bıýdjet qarajaty esebinen jumyssyz retinde tirkelgen adamdar men tabysy óte tómen adamdar úshin MÁMS jarnalaryn tóleýdi júzege asyrýǵa baǵyttalǵan, - delingen mınıstrliktiń Kazinform agenttigine bergen jaýabynda.
Qazirgi kezde 16,7 mln adam (83 %) saqtandyrylǵan, onyń ishinde 11,9 mln adam halyqtyń jeńildikti sanattaryna jatady, olar úshin MÁMS jarnalaryn memleket tóleıdi.
Shamamen 3,3 mln adam MÁMS júıesinen tys qaldy:
1) 2,4 mln adam ómir súrý deńgeıi qolaıly jáne qanaǵattanarlyq azamattar;
2) 1 mln adamnyń tabysy tómen.
- Bul azamattardy MÁMS júıesine tartý jáne olardyń saqtandyrylýshylarmen teń dárejede medıtsınalyq kómekke qol jetkizýin qamtamasyz etý úshin olardyń jarnalaryn medıtsınalyq kómekke júginý faktisi boıynsha jergilikti bıýdjet esebinen tóleý usynyldy. Budan basqa, JAO-nyń jumyssyzdyq deńgeıin tómendetý jáne halyqty jumyspen qamtýǵa járdemdesý úshin tikeleı jaýapkershiligin eskere otyryp, resmı tirkelgen jumyssyzdar úshin MÁMS jarnalaryn tóleýge shyǵystardy jergilikti bıýdjetterge júkteý usynyldy. Bul sondaı-aq turaqty jumys orny men tabysy joq azamattardy densaýlyq saqtaý qyzmetterimen qamtýǵa múmkindik beredi. Osy sharalardyń arqasynda 2026 jyly MÁMS júıesimen qosymsha 1 mln adam qamtylady dep sanaımyz. Bul el azamattarynyń 5 paıyzdan astamy josparly medıtsınalyq kómekke qol jetkize alatynyn bildiredi, sonyń nátıjesinde densaýlyq saqtaý júıesiniń júktemesin azaıta otyryp, ulttyń jalpy densaýlyǵy men ál-aýqatyn arttyrady, - dep atalyp ótken QR DSM aqparatynda.
Vedomstvo málimetinshe, ómir súrý deńgeıi qolaıly jáne eńbekke qabiletti jastaǵy adamdar qataryndaǵy qalǵan 2,4 mln adamǵa qatysty aqparattyq-túsindirý jalǵasyp jatyr. Sondaı-aq azamattardyń osy tobynyń MÁMS júıesine qatysýyn arttyrý úshin Úkimet pen jergilikti atqarýshy organdar ekonomıkalyq qyzmetti «kóleńkeden» shyǵarý boıynsha birlesken jumysty atqaryp otyr. Densaýlyq saqtaý mınıstrligi osy jumystyń nátıjeleri boıynsha azamattardyń kóp bóligi áleýmettik júıege, onyń ishinde MÁMS júıesine qatysý múmkindigine ıe bolady dep esepteıdi.
Budan buryn habarlanǵandaı, bıyl naýryz aıynda Parlament Májilisinde «Qazaqstan Respýblıkasynyń keıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» zań jobasy tanystyryldy.