MÁMS júıesinen tys qalǵan 3,3 mln adam qalaı qamtylady – mınıstrlik túsinik berdi
ASTANA. KAZINFORM — Jumyssyz adamdardyń MÁMS jarnalaryn tóleý shyǵystaryn jergilikti bıýdjetterge júkteý usynyldy. Bul týraly búgin Parlament Májilisinde mindetti áleýmettik medıtsınalyq saqtandyrý máseleleri zań jobasyn tanystyrý kezinde QR Densaýlyq saqtaý mınıstri Aqmaral Álnazarova aıtty.
- Qazir shamamen 16,7 mln (82,3 %) adam saqtandyrylǵan bolsa, onyń 12,1 mıllıony (72,5%) jeńildikti sanattarǵa jatady, 3,3 mln adam MÁMS júıesinen tys qalǵan. Onyń ishinde 2,4 mln adamnyń ómir súrý deńgeıi qanaǵattanarlyq azamattar bolsa, al 1 mıllıony áleýmettik ál-aýqattyń daǵdarystyq jáne shuǵyl deńgeılerine jatatyn osal toptaǵy azamattar, ıaǵnı tabysy tómen ári otbasynyń bazalyq qajettilikterin áreń jabatyn adamdar. Osy sanattaǵy azamattar úshin halyqaralyq tájirıbege sáıkes, jarnalardyń tólenýi tıisti medıtsınalyq kómekke júginý faktisi boıynsha jergilikti atqarýshy organdarǵa (JAO) júkteý usynylady. Budan basqa, resmı tirkelgen jumyssyz azamattardyń MÁMS jarnalaryn tóleý shyǵystaryn 2027 jyldan bastap jergilikti bıýdjetterge júkteý usynyldy, - dedi A. Álnazarova.
Onyń aıtýynsha, osy sharalardyń esebinen 2026 jyly MÁMS júıesimen qosymsha bir mıllıonnan astam adam qamtylýy múmkin. Bul degenimiz, azamattardyń qosymsha 5 paıyzy josparly medıtsınalyq kómekke qol jetkizedi degen sóz.
- Medıtsınalyq kómekti paketter boıynsha jasandy bólý problemasyn sheshý úshin 2026 jyldan bastap Tegin medıtsınalyq kómektiń kepildendirilgen kólemi (TMKKK) paketinen negizgi mindettemelerdi MÁMS júıesine aýystyrý arqyly kezeń-kezeńimen biriktirý usynylady (birinshi kezeń ishinara 2025 jyldan bastalady), - dedi mınıstr.
Biryńǵaı paketke kóshýdiń negizgi maqsattary:
- saqtandyrý mártebesine qaramastan, keń taralǵan aýrýlar boıynsha bazalyq medıtsınalyq kómekti kepildendirilgen túrde qamtamasyz etý;
- paketter arasyndaǵy medıtsınalyq qyzmetterdiń bir-birine kóshýin boldyrmaý;
- sozylmaly aýrýlary bar naýqastardy barynsha medıtsınalyq baqylaýmen qamtý.
- Nátıjesinde, júıeniń ashyq jáne ádil bolýy júzege asady. Árbir azamat qandaı qyzmetterge kepildik beriletinin jáne MÁMS júıesinde qandaı qyzmetter qarastyrylǵanyn biletin bolady. Jalpy alǵanda, Biryńǵaı pakettiń negizgi qurylymy memlekettiń kepildendirilgen kómegi paketinen jáne saqtandyrylǵan kómek deńgeıinen qalyptasady. Osylaısha, 2027 jyldan bastap qarjylandyrýdyń saqtandyrý modeline kóshýdi josparlap otyrmyz. Osy oraıda medıtsınalyq kómektiń Biryńǵaı paketin kezeń-kezeńimen qalyptastyrý usynylǵan. Sonymen qatar, depýtattardan kelip túsken usynystar qaralyp jatyr. Olardy eskere otyryp, medıtsınalyq kómektiń qoljetimdi bolýyn qamtamasyz etý úshin tegin medıtsınalyq kómektiń kepildendirilgen kólemindegi qyzmetter paketinde bazalyq medıtsınalyq sanıtarııalyq alǵashqy kómekti (MSAK) qarastyrýǵa daıynbyz, - dedi vedomstvo basshysy.
Onyń sózine qaraǵanda, atalǵan zań jobasyndaǵy bastalamalar júzege asqannan keıin, TMKKK paketinde medıtsınalyq qyzmetterdiń úlken spektrin emin-erkin paıdalaný saqtalady. Sonyń arasynda vaktsınatsııa jáne onkologııalyq skrınıngter, áleýmettik máni bar aýrýlar boıynsha kúdik bolǵan jaǵdaıda dıagnostıkalar (týberkýlez, AITV, sozylmaly vırýstyq gepatıtter jáne baýyr tsırrozy, qaterli isikter, psıhıkalyq jáne minez-qulyq buzylystary, orfandyq aýrýlar, jedel mıokard ınfarktisi (6 aıǵa deıin.), ınsýlt (1 jylǵa deıin)) tolyǵymen tegin bolady. Sondaı-aq juqpaly aýrýlar kezindegi medıtsınalyq kómek jáne medıtsınalyq kómektiń basqa túrleri kepildendirilgen pakettiń ishinde bolady.
Budan buryn habarlanǵandaı, búgin Parlament Májilisinde «Qazaqstan Respýblıkasynyń keıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» zań jobasy tanystyryldy.