MÁMS júıesine ózgerister engizildi: qazaqstandyqtardy ne kútip tur

ASTANA. KAZINFORM – 2026 jylǵy 1 qańtardan bastap otandyq densaýlyq saqtaý júıesinde jańa normalar kúshine enedi. Májilis pen Senat maquldaǵan tıisti zań Prezıdenttiń qol qoıýyna joldandy. Qazaqstandyqtar men densaýlyq saqtaý júıesin qandaı ózgerister kútip turǵanyn Kazinform agenttiginiń tilshisine Densaýlyq saqtaý mınıstri Aqmaral Álnazarova aıtyp berdi.

Mınıstrdiń aıtýynsha, basty jańalyqtardyń biri – medıtsınalyq qyzmet paketin naqty bólý.

— 2021 jyly Memleket basshysy kepildendirilgen jáne saqtandyrý paketine kiretin qyzmetti naqty ajyratý qajet ekenin tapsyrdy. Jańa zań jobasy aıasynda qyzmetti naqty bóldik. Bul emhanalar úshin barlyq qarjy jáne patsıent aǵynyn basqarýǵa múmkindik beredi, ashyqtyqty qamtamasyz etedi, — dedi Aqmaral Álnazarova.

Ekinshi mańyzdy ózgeris – onkologııalyq skrınıng mindetti áleýmettik medıtsınalyq saqtandyrý (MÁMS) paketinen kepildendirilgen tegin medıtsınalyq kómek kólemi (TMKKK) paketine kóshirildi. Bul búkil halyqqa onkologııalyq aýrýlardy erte anyqtaý qyzmettine qol jetkizýge múmkindik beredi.

Úshinshi jańashyldyq josparly medıtsınalyq kómek alýdyń aıasy keńeıdi. 

— Búginde shamamen 3 mıllıon azamat MÁMS júıesine jarna tólemeıdi, sondyqtan da olar josparly medıtsınalyq kómekti ala almaı otyr. Osy sanattaǵy azamattarǵa qatysty «Tsıfrlyq otbasy kartasy» aıasynda zertteý júrgizildi. Bul qural otbasy músheleriniń árqaısysynyń tabysyn kórýge múmkindik beredi. Eger otbasynda ekonomıkalyq qıyndyq bary anyqtalsa, jergilikti atqarýshy organdar, ıaǵnı ákimdiktiń qarajaty esebinen saqtandyrý mártebesi beriledi, — dep túsindirdi mınıstr. 

Mınıstrliktiń esepteýinshe, 2026 jylǵy 1 qańtardan bastap shamamen 1 mıllıon adam josparly medıtsınalyq kómekke qol jetkizedi. 

Reformanyń taǵy bir jańa qyry – saqtandyrý júıesiniń turaqtylyǵyna baılanysty.

— Densaýlyq saqtaý júıesi úshin barlyq ózekti esep júrgizildi. Qabyldanǵan normalar saqtandyrý júıesiniń qarjylyq turaqtylyǵyn 2043 jylǵa deıin jáne odan keıin de qamtamasyz etedi. Biz qarjylyq turaqtylyqty qalap otyrmyz, — dep tolyqtyrdy Aqmaral Álnazarova.

2026 jylǵy qańtardan bastap jarnany esepteý bazasynyń jańa joǵarǵy shegi engiziledi, ıaǵnı jumys berýshiler úshin — 40 eń tómengi jalaqy, jumysshylar úshin 20 eń tómengi jalaqy mólsheri belgilendi. Atalǵan ózgerister joǵary tabysy bar jumysshylardyń shamamen 9%-yn (500 myńnan astam adam) qamtıdy. MÁMS júıesiniń tabys bóliginiń ósimi jylyna shamamen 200 mlrd teńgeni quraıdy dep baǵalanyp otyr. 

Sonymen qatar, memleket tarapynan MÁMS júıesine jarna mólsherin kezeń-kezeńimen arttyrý kózdelip otyr: 

- 2027 jyly — 2,2%-dan bastap; 
- 2037 jyly — 4,7%-ǵa deıin.

MÁMS júıesinde jańa norma engiziledi — 5 jyl qatarynan turaqty jarna tólegen azamattar tólemdi ýaqytsha toqtatqan jaǵdaıda, 6 aı boıy mártebesin saqtap qalady. 

Aıta keteıik, 2025 jylǵy 21 mamyrda Májilis MÁMS júıesine ózgerister engizilgen zańdy qabyldady.

Bıyl maýsymdaǵy málimetke súıensek, MÁMS aıasynda 1,1 trln teńgege medıtsınalyq kómek kórsetildi.