MÁMS júıesine ózgeris engizildi – Májilis zańdy qabyldady

ASTANA. KAZINFORM –  Búgin Májilis mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly zańdy ekinshi oqylymda qabyldady.

- Zań jobasy mindetti áleýmettik medıtsınalyq saqtandyrý (MÁMS) júıesinde memlekettiń qyzmetin quqyqtyq jáne uıymdastyrýshylyq turǵydan jetildirýge baǵyttalǵan. Zań jobasynda bazalyq memlekettik medıtsınalyq kómektiń biryńǵaı paketin qalyptastyrýǵa, saqtandyrylǵan mártebesin qamtamasyz etýge, resmı tirkelgen jumyssyzdar men áleýmettik ál-aýqaty daǵdarystyq, shuǵyl deńgeıdegi azamattarǵa jergilikti bıýdjet esebinen medıtsınalyq kómekke qoljetimdilikti qamtamasyz etýge, sondaı-aq memleket tarapynan MÁMS júıesine jarna mólsherin kezeń-kezeńimen ózgertýge baǵyttalǵan quqyqtyq normalar kózdelgen, - dedi Májilis depýtaty Gúldara Nurym Májilistiń jalpy otyrysynda.

Májilis zań jobasyna kelesi usynystar engizdi:

- Saqtandyrylǵan mártebesine qaramastan, alǵashqy júgingen kezde jáne áleýmettik mańyzy bar aýrýlardy aldyn alý, dıagnostıkalaý jáne emdeý, sondaı-aq jekelegen skrınıngter boıynsha qyzmet kórsetýde bastapqy medıtsınalyq-sanıtarlyq kómektiń bazalyq paketin tegin medıtsınalyq kómektiń kepildik berilgen kólemi aıasynda saqtaý;

- Jalaqynyń aılyq tabysynan MÁMS júıesine aýdarymdar esebiniń shekti mólsherin 50 eń tómengi jalaqydan 20 eselikke deıin, al jumys berýshiler úshin – 40 eselik eń tómengi jalaqyǵa deıin tómendetý;

- MÁMS júıesiniń tartymdylyǵyn qamtamasyz etý maqsatynda jarnalardy qatarynan 60 aı boıy tólegen azamattar úshin jarna tóleý toqtatylǵan sátten bastap 6 aı boıy saqtandyrylǵan mártebesin saqtaý;

- Áleýmettik mańyzy bar aýrýlardyń tizbesin zańmen bekitý.

Sonymen qatar, áleýmettik medıtsınalyq saqtandyrý qory men densaýlyq saqtaý sýbektileriniń qarjylyq qyzmetiniń ashyqtyǵyn arttyrý maqsatynda depýtattar kelesi normalardy usyndy:

- MÁMS júıesindegi qarjylyq qozǵalystar týraly málimetterdi resmı ınternet-resýrstarda mindetti túrde jarııalaý;

- Qyzmetterdi satyp alý sharty boıynsha mindettemeni oryndamaǵan nemese tıisinshe oryndamaǵan densaýlyq saqtaý sýbektilerinen qarjyny qaıtarý;

- Ýákiletti organnyń birinshi basshysynyń tapsyrmasy boıynsha, sondaı-aq buqaralyq aqparat quraldarynda naqty derekter jarııalanǵan jaǵdaıda jospardan tys tekserýler júrgizý.

- Medıtsınalyq qyzmet kórsetý salasyndaǵy baqylaýdy kúsheıtý jáne qadaǵalaýdy engizý boıynsha usynylǵan normalar qyzý talqylandy. Depýtattar densaýlyq saqtaý salasyndaǵy ýákiletti organǵa anyqtalǵan buzýshylyqtarǵa jedel den qoıý sharalaryn qoldaný quqyǵymen qadaǵalaý fýnktsııasyn berý usynysyn engizdi. Úkimettiń qorytyndysyna sáıkes, tıisti lıtsenzııa nemese sertıfıkat bolmaǵan jaǵdaıda qadaǵalaýdy engizý jónindegi túzetýler qabyldandy, - deıdi G. Nurym.

Zań jobasyn talqylaý barysynda keıbir usynystar qoldaý tappaǵan, tıisinshe qabyldanbady:

- medıtsınalyq qyzmetterge ýaqytyly aqy tóleý;

- baqylaý, monıtorıng jáne aıyppul sanktsııalaryn qoldaný fýnktsııalaryn qor men medıtsınalyq jáne farmatsevtıkalyq baqylaý komıteti men ýákiletti organ arasynda bólý arqyly sybaılas jemqorlyq táýekelderiniń aldyn alý.

- Zań jobasy aıasynda qaralatyn máseleler aýqymynyń keńeıýin eskere otyryp, depýtattar zań jobasynyń ataýyn: «Qazaqstan Respýblıkasynyń keıbir zańnamalyq aktilerine mindetti áleýmettik medıtsınalyq saqtandyrý jáne medıtsınalyq qyzmet kórsetý máseleleri boıynsha ózgerister men tolyqtyrýlar engizý týraly» dep ózgertý jóninde usynys engizdi. Májilistiń barlyq komıteti zań jobasy boıynsha qorytyndylaryn berdi. Jumys tobynyń 19 otyrysy jáne komıtettiń úsh keńeıtilgen otyrysy ótkizildi, depýtattardyń 200-ge jýyq usynysy qaraldy, - dep tolyqtyrdy halyq qalaýlysy.

Eske salsaq, 30 sáýirde Májilis MÁMS júıesin jetildirýge qatysty zań jobasyn birinshi oqylymda maquldaǵan edi.