MÁMS júıesinde sapasyz qyzmet kórsetken mekemeler qarjyny qaıtarady
ASTANA. KAZINFORM – «Mindetti áleýmettik medıtsınalyq saqtandyrý týraly» Zańǵa engizilgen ózgerister medıtsına uıymdary men Áleýmettik medıtsınalyq saqtandyrý qory qyzmetiniń ashyqtyǵyn arttyrýǵa baǵyttaldy, dep habarlaıdy qordyń baspasóz qyzmeti.
Medıtsınalyq jáne farmatsevtıkalyq baqylaý komıtetine jańa ókilettikter berildi. Endi komıtet tıisti ruqsat qujattary joq medıtsınalyq qyzmet kórsetý jaǵdaılaryn anyqtap, jolyn kesýge quqyly. Tekserýdi bastaýǵa tek patsıenttiń shaǵymy ǵana emes, sondaı-aq Densaýlyq saqtaý mınıstriniń tapsyrmasy nemese zańbuzýshylyqty dáleldeıtin BAQ-ta jarııalanǵan materıaldar da negiz bola alady.
«Bul Kásipkerlik kodeksinde bekitilgen norma patsıentterge qosymsha qorǵaý deńgeıin qamtamasyz etip, qyzmetter tek bilikti ári lıtsenzııalanǵan medıtsınalyq uıymdar tarapynan kórsetiletindigine kepildik beredi», – dedi Áleýmettik medıtsınalyq saqtandyrý qory basqarma tóraǵasynyń orynbasary Sáýle Tájibaeva.
Jańa normalar medıtsınalyq uıymdardy patsıenttiń suraýy boıynsha, eger bul aqparat ashyq qoljetimdi bolmasa, lıtsenzııalar men sanıtarııalyq-epıdemıologııalyq qorytyndylar týraly málimet berýge mindetteıdi. Sonymen qatar, Qor medıtsınalyq uıymdardyń qarjylyq derekterin kóre alady jáne kelisimshart talaptary buzylǵan jaǵdaıda kórsetilmegen nemese sapasyz qyzmet úshin alynǵan qarajatty qaıtarýdy talap ete alady.
«Patsıentterdi emdeýge bólingen árbir teńge tıimdi jumsalýy tıis. Qarjylyq ashyqtyq — medıtsınalyq kómektiń sapasyn arttyrǵa jol ashady», – dep atap ótti Sáýle Tájibaeva.
Ashyqtyq normalary Qor qyzmetine de qatysty. Áleýmettik medıtsınalyq saqtandyrý qorynyń resmı saıtynda ár toqsan saıyn MÁMS júıesine túsetin qarajattar, olardyń medıtsınalyq kómek túrlerine bólinýi, árbir medıtsınalyq uıymǵa baǵyttalǵan tólemder jáne Qordyń ákimshilik shyǵyndary týraly derekter jarııalanady.
Qabyldanǵan sharalar mindetti áleýmettik medıtsınalyq saqtandyrý júıesiniń ashyqtyǵyn arttyrýǵa, kórsetilgen qyzmetterdiń sapasy men kólemine baqylaýdy kúsheıtýge jáne azamattardyń senimin nyǵaıtýǵa baǵyttalǵan.
Aıta keteıik, qant dıabetimen aýyratyndar endi dárini tek MÁMS arqyly alady.