MÁMS júıesinde qamtylmaǵan azamattardyń mártebesin anyqtaý júrip jatyr
ASTANA. KAZINFORM – Mindetti medıtsınalyq saqtandyrý júıesinde qamtylmaǵan azamattardyń mártebesin anyqtaý júrip jatyr. Bul týraly Májilistiń jalpy otyrysynda Premer-Mınıstrdiń orynbasary Tamara Dúısenova málim etti.
«Saılaýshylar kóp kóterip júrgen máselelerdiń biri - mindetti medıtsınalyq saqtandyrý júıesi. Medıtsınalyq saqtandyrý júıesiniń tıimdi ekenin damyǵan elderdiń, ásirese OESR tájirıbesi kórsetip otyr. Olardyń tájırbesi bul júıeniń 3 máseleni sheshkenin baıqadyq. Birinshiden, klınıkalardyń basym kópshiligi naýqastardy emdeý úshin eń jaqsy jaǵdaı jasaýǵa ótken. Olaı bolmasa, ol qarjy ala almaıdy, sebebi qarajat aýryp qalǵan azamat tańdaǵan klınıkaǵa tólendi. Ekinshiden, azamattyń densaýlyǵyn qorǵaý boıynsha jaýapkershilikti tek memleketke emes, sonymen birge jumys berýshi men jumyskerlerge júkteýdi qarastyrǵan jalǵyz júıe de osy. Úshinshiden, júıeniń yntymaqty qaǵıdatta jumys isteýi medıtsınalyq kómektiń barlyq túriniń qoljetimdiligin qamtamasyz etedi», - dedi T. Dúısenova.
Onyń aıtýynsha, qazir Memleket basshysynyń tapsyrmasy aıasynda osy ozyq tájirıbeni engizý boıynsha tıisti jumys atqarylyp jatyr. Onyń birinshisi - júıemen qamtylmaǵan azamattardyń mártebesin anyqtaý.
«Qazir óńirlerde tıisti shtabtar qurdyq. Túgendeý jumystary kezeń-kezeńmen júrip jatyr. 130 myń azamat boıynsha bul jumys aıaqtaldy, endi 750 myń adamǵa qatysty tıisti jumys bastaldy. Nátıjesinde, áleýmettik osal topqa jatatyn azamattar úshin memleket, al jumys isteıtin azamattar úshin jumys berýshiler jáne azamattardyń ózderi jarna tóleıtin bolady», - dedi vıtse-premer.
Budan buryn habarlanǵandaı, QR Densaýlyq saqtaý mınıstrligi medıtsınalyq saqtandyrýdan tys qalǵan halyqtyń bir bóligin qamtýǵa qatysty túsinik berdi. Sebebi osy adamdar skrınıng, medıtsınalyq tekserýmen qamtylmaı otyr.
