MÁMS júıesin reformalaýdy jalǵastyrý kerek – Qasym-Jomart Toqaev
ASTANA. KAZINFORM – Mindetti áleýmettik medıtsınalyq saqtandyrý júıesin jetildirý týraly zań jobasy jedel pysyqtalýy kerek jáne osy sessııanyń sońyna deıin qabyldanýǵa tıis. Bul týraly Prezıdent Qasym-Jomart Toqaev Úkimettiń keńeıtilgen otyrysynda aıtty.
− Men memlekettiń áleýmettik baǵdarlamalaryn barynsha ádil qarjylandyrý týraly tapsyrma berdim. Úkimet bul jumysty bastady. Byltyr densaýlyq saqtaý salasynyń ózinde 140 mıllıardtan astam teńge orynsyz shyǵyn anyqtalyp, tıimdi jumsaldy. Demek jaýapkershilikpen qaraǵan kezde qosymsha qarajat kózin de tabýǵa bolady, − deıdi Memleket basshysy.
Prezıdent mindetti áleýmettik medıtsınalyq saqtandyrý júıesin reformalaýdy jalǵastyrý keregin de aıtty. Sonymen qatar birqatar zańnamalyq shara qabyldaý qajet.
− Úkimet Parlamentpen birge mindetti áleýmettik medıtsınalyq saqtandyrý júıesin jetildirý týraly zań jobasyn jedel pysyqtaýy kerek. Qujat osy sessııanyń sońyna deıin qabyldanýǵa tıis. Aýyldaǵy densaýlyq saqtaý júıesin jańǵyrtý» ulttyq jobasy aıasynda eki jylda halyqqa alǵashqy dárigerlik kómek kórsetetin 460 nysan paıdalanýǵa berildi. Taǵy 195 nysan jyl sońyna deıin salynyp bitedi. Alaıda kópbeıindi ortalyq aýdandyq aýrýhanalardy jańǵyrtý jumysy oıdaǵydaı júrip jatqan joq, - dedi Prezıdent.
Jospar boıynsha bıyl 32 aýrýhanaǵa jóndeý júrgizilýge tıis. Biraq onyń teń jartysynyń jobalyq-smetalyq qujaty endi ǵana ázirlenip, saraptama jasalyp jatyr.
Bul mekemelerdi medıtsınalyq quraldarmen jabdyqtaý máselesi de sheshimin tappaǵan.
− Úkimet pen ákimder alǵashqy kómek kórsetý nysandarynyń barlyǵyn jyl sońyna deıin túgel iske qosýy kerek. Al kópbeıindi ortalyq aýdandyq aýrýhanalardy jańǵyrtý jumystaryn kelesi jyldyń sońyna deıin aıaqtaýdy tapsyramyn, − dedi Qasym-Jomart Toqaev.
Osy ýaqytta Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.
Otyrysta Memleket basshysy alǵashqy AES qurylysyn tezdetý qajettigin eskertti.
24b42/