MÁMS júıesimen qosymsha 1 mln-nan astam adam qamtylady

ASTANA. KAZINFORM – Memleket basshysynyń Joldaýyn jáne ózge de tapsyrmalaryn oryndaý sheńberinde Úkimet medıtsınalyq kómektiń qoljetimdiligin arttyrý úshin mindetti áleýmettik medıtsınalyq saqtandyrý júıesin damytý jáne nyǵaıtý boıynsha júıeli jumys júrgizip jatyr.

«Mindetti áleýmettik medıtsınalyq saqtandyrý týraly» Zańda densaýlyq saqtaý júıesiniń qarjylyq turaqtylyǵyn nyǵaıtýǵa baǵyttalǵan birqatar sharany júzege asyrý kózdelgen.

Áleýmettik osal toptardy MÁMS-pen qamtýdy keńeıtý: Halyqty barynsha júıege tartý maqsatynda áleýmettik osal toptaǵy azamattar úshin jarnalardy jergilikti atqarýshy organdardyń tóleý tetigi engiziledi. 

Bul normany iske asyrý 2026 jylǵa qaraı qosymsha 1 mln-nan astam adamdy MÁMS júıesimen qamtýǵa múmkindik beredi.

Ádil jarna júıesin engizý: Áleýmettik ádilettilik qaǵıdatyn saqtaý úshin Áleýmettik medıtsınalyq saqtandyrý qoryna aýdarym jasalatyn kiristiń joǵarǵy shegi alynyp tastalady. Bul tásil azamattardyń júıege úlesin olardyń tabysyna saı etip, sala bıýdjetine jyl saıyn qosymsha 200 mlrd teńgege deıin qarjy ákeledi. 

Memlekettik qarjylandyrýdy arttyrý: Jeńildikti sanattaǵy 11 mln azamat úshin memleket jarnasynyń mólsherlemesin kezeń-kezeńimen arttyrý kózdelgen. Bul shara 2030 jylǵa qaraı qarjylandyrý kólemin 289 mlrd teńgege deıin ulǵaıtýǵa múmkindik beredi.

Biryńǵaı medıtsınalyq qyzmetter paketin qalyptastyrý: 2027 jyldan bastap memleket kepildik beretin tegin medıtsınalyq kómek kólemi (TMKKK) men MÁMS paketi arasyndaǵy naqty aıyrmashylyqty belgileıtin biryńǵaı paket engiziledi.

Osylaısha árbir azamat memleket kepildik beretin qyzmetterdi jáne saqtandyrý esebinen kórsetiletin qyzmetterdi naqty bile alady.

Buǵan deıin habarlanǵandaı, profılaktıkalyq skrınıngter memleket kepildik bergen medıtsınalyq qyzmetter paketine engizildi.