MÁMS júıesine jarna tóleýdiń jańa tetigi iske qosyldy

NUR-SULTAN. QazAqparat – Mindetti áleýmettik medıtsınalyq saqtandyrý (MÁMS) júıesine jarna quıýdyń jańa ádisi iske qosyldy. Bul týraly Áleýmettik medıtsınalyq saqtandyrý qory Nur-Sultan qalasy boıynsha fılıalynyń dırektory Nurlybek Qabdyqaparov málim etti, dep habarlaıdy QazAqparat tilshisi.

«MÁMS júıesine tirkelmegender josparly jáne joǵary tehnologııalyq medıtsınalyq kómek pen aýrý-syrqaýdyń aldyn alý jáne medıtsınalyq dıagnostıkaǵa qol jetkizýin qıyndatada túsedi. Osy rette engizilgen jańa jarna tóleý mehanızmi oń yqpal etedi dep oılaımyz. Bıyl 5 qyrkúıekten bastap MÁMS júıesine qatysýdyń jańa tetigi iske qosyldy. Endigide qatysýshy aldyn ala bir jylǵa jarna tóleı alady. Bul múmkindikti MÁMS júıesinde «saqtandyrylǵan» mártebesi bar, sondaı-aq júıege eshqashan tólem jasamaǵan nemese turaqty tólemeı kelgen barlyq klıent paıdalana alady», - dedi Nurlybek Qabdyqaparov ZOOM paltformasynda ótken baspasóz máslıhatynda.

Onyń aıtýynsha, osy ýaqytqa deıin MÁMS júıesine tirkelmegen nemese jarnany turaqty tólemeı kelgen qatysýshylar aldyn ala 1 jyldyq jarnany tólep, júıede «saqtandyrylǵan» mártebesin ala alatyn.

«Áleýmettik medıtsınalyq saqtandyrý qoryna túsken barlyq jarna aýdarymdary senimgerlik basqarý týraly jasalǵan kelisimshartqa sáıkes Ulttyq bankte saqtalady. Ol medıtsınalyq qyzmetter aqysyn tóleýge jumsalady. ıAǵnı halyqqa kórsetilgen medıtsınalyq qyzmetterdiń sapasy men kólemine monıtorıng jasap, teksergennen keıin ǵana qor jetkizýshilerge tólem júrgizedi», - deıdi ol.

Fılıal basshysynyń málimetinshe, qazir elorda turǵyndarynyń 82,6% MÁMS júıesiniń qatysýshysy. Naqty aıtsaq, 2022 jylǵy 1 qyrkúıektegi jaǵdaı boıynsha, Nur-Sultan qalasynda MÁMS qatysýshylarynyń sany – 1 075 618. Júıeden 227 136 azamat tys qalyp otyr.