MÁMS júıesindegi medıtsınalyq uıymdardyń jumysynan 11,8 mlrd teńgeniń kemshiligi anyqtalǵan
Ortalyq kommýnıkatsııalar qyzmetinde ótken brıfıngide Áleýmettik medıtsınalyq saqtandyrý qorynyń basqarma tóraǵasy Aıdyn Ashýev osyndaı málimet aıtty.
Aıtýynsha, qor sarapshylary medıtsınalyq uıymdardyń jumysynan 11,8 mlrd teńgeniń 882,6 myńnan astam kemshiligin anyqtaǵan.
«Búginde medıtsınalyq kómektiń sapasyn qamtamasyz etý úshin aǵymdaǵy, maqsatty, jospardan tys, proaktıvti túrleri boıynsha monıtorıng júrgizilýde. Kemshilikterdiń basym bóligi konsýltatıvtik-dıagnostıkalyq qyzmet kórsetetin mekemelerde anyqtaldy. Kóbinese tólem aýdarylýy tıis qyzmetterdiń sany negizsiz joǵary usynyldy. Mysaly, 1 qyzmet kórsetilse, 3 qyzmetti tóleýge usynady», - dedi qor basshysy.
Aıdyn Ashýev kemshilikterdiń qaı salada jıi kezdesetininin saralap aıtty.
«Onyń ishinde qor sarapshylary jalpy somasy 214,2 mln teńgege medıtsınalyq qyzmet kórsetýdiń 28,6 myń rastalmaǵan jaǵdaıyn anyqtady. Budan bólek, qor proaktıvti monıtorıng engizdi jáne ony 2 jyl boıy júrgizip keledi. Onda anyqtalǵan buzýshylyqtarǵa aıyppul sanktsııalary qoldanylmaıdy. Olardy 45 kún ishinde joıýǵa múmkindik beriledi. Osy merzim ótkennen keıin joıylmaǵan kemshilikter boıynsha somalar tólemnen alynady», - dedi Áleýmettik medıtsınalyq saqtandyrý qorynyń basqarma tóraǵasy.
Foto: ortcom.kz
