MÁMS júıesinde medıtsınalyq kómek kólemi 66,6% qoldan kóbeıtilgen

NUR-SULTAN. QazAqparat – Bıylǵy jyldyń 1 toqsanynyń qorytyndysy boıynsha MÁMS júıesine qatysty 207 myń kemshilik anyqtaldy. Bul týraly Mindetti áleýmettik medıtsınalyq saqtandyrý qorynyń basqarma tóraǵasy Aıdyn Ashýev málim etti, dep habarlaıdy QazAqparat tilshisi.

«MÁMS júıesi arqyly kórsetiletin medıtsınalyq qyzmetter boıynsha júrgizilgen monıtorınginiń qorytyndysy boıynsha 2022 jyldyń 1 toqsanynda 207 myń kemshilik anyqtaldy. 4,8 mlrd teńgege ekonomıkalyq yqpal etý sharalary iske asyryldy. Bul ótken jylmen salystyrǵanda 37 paıyz joǵary. 2021 jyly MÁMS júıesine qatysty 1 mln 100 myń aqaý anyqtaldy. 25,7 mlrd teńgege ekonomıkalyq yqpal etý sharalary júzege asty. Eń jıi anyqtalatyn aqaý – medıtsınalyq kómek kólemin jasandy túrde arttyrý. 66,6 paıyz qoldan arttyrǵan. Sonymen qatar restandarttar men klınıkalyq hattamalardan negizsiz aýytqý kemshiligi 16,5 paıyz kórsetip otyr», - dedi Aıdyn Ashýev elordada ótken mindetti áleýmettik medıtsınalyq saqtandyrý máselelerine arnalǵan dóńgelek ústel barysynda.

Sondaı-aq, qor basshysynyń málimetinshe, MÁMS júıesi aıasynda kórsetilgen medıtsınalyq kómektiń 1,9 paıyzy rastalmaı shyqqan.

«Osy oraıda júıe aıasynda usynylatyn medıtsınalyq kómek pen halyqtan kelip túsetin ótinish, aryz-shaǵymǵa asa mán berý kerek. Halyqpen keri baılanys ornatý maqsatynda «1406» Call ortalyǵy jumys istep tur. Odan bólek, «Qoldau – 24/7» mobıldik qosymshasy bar. Bıylǵy jyldyń 1 toqsanynda qor barlyq keri baılanys arnasy boıynsha 208 myń ótinish qabyldap, óńdedi», - deıdi ol.

Aıta ketsek, elordada mindetti áleýmettik medıtsınalyq saqtandyrý júıesi qyzmetine arnalǵan dóńgelek ústel ótti.

Atalǵan sharaǵa sala mamandary men jaýapty tulǵalar qatysyp MÁMS-ke qatysty túıtkildi máselelerdi ortaǵa saldy.