MÁMS júıesinde áleýmettik mártebeni qalaı bilýge bolady
Áleýmettik medıtsınalyq saqtandyrý qorynyń málimetinshe, qazirgi tańda MÁMS úshin aýdarymdardy jumys berýshiler ózderiniń jumysshylary úshin aı saıyn 1,5% mólsherinde tóleıdi. Al 2020 jyldan bastap jeke kásipkerler, notarıýstar, jumysshylar, ózin-ózi jumyspen qamtyǵan jáne basqa da eńbek túrlerimen aınalysatyn tulǵalar MÁMS júıesi aıasynda medıtsınalyq kómek alý úshin jarna tóleı bastaıdy. Jarna mólsheri azamattyń mártebesine baılanysty bolady.
Árbir azamat MÁMS júıesiniń qatysýshysy bola otyra, júıe aıasynda medıtsınalyq qyzmet alý úshin óziniń áleýmettik mártebesin anyqtaýy tıis. Mártebesi anyqtalmaǵan tulǵalar úshin MÁMS júıesindegi medıtsınalyq qyzmetter qoljetimsiz bolady.
Áleýmettik mártebeni anyqtaýdyń birneshe joly bar. Birinshiden, eger azamat beıresmı jumys isteıtin bolsa, onda ol jumys berýshimen eńbek shartyn jasaýy kerek. Ekinshiden, eger azamat tabys ákeletin qandaı da bir kásipkerlikpen aınalysatyn bolsa, onda salyq organdarynda tirkelýi tıis. Eger azamattyń tabys kózi bolmaı, jumyssyz bolsa, turǵylyqty mekenjaıy boıynsha Halyqty jumyspen qamtý ortalyǵynda jumyssyz retinde tirkelýi kerek. Ortalyqta azamatty jumysqa ornalastyrý jáne kásibı qaıta daıarlaý boıynsha qoldaý kórsetiledi. Jumyssyz mártebesin alǵan azamattar jeńildigi bar sanatqa jatqyzylady. Olar medıtsınalyq saqtandyrýdy memleket tarapynan alýǵa quqyly.
MÁMS sheńberinde áleýmettik mártebeni anyqtaý egov.kz portalynda da qoljetimdi. Ol úshin «Tekserý servısteri» bóliminen «Áleýmettik mártebesin tekserý» qyzmetin tańdap, ózińizdiń JSN-dy terip, ótinish jiberesiz. Bul rette jaýap qolma-qol qaıtarylady. Qyzmetti elektrondyq tsıfrlyq qoltańba arqyly portalǵa tirkelgen jaǵdaıda alýǵa bolady.
Aıta keterligi, Qazaqstanda mindetti áleýmettik medıtsınalyq saqtandyrý júıesi kezeń-kezeńimen engizilip jatyr. Mindetti medıtsınalyq saqtandyrý paketi halyq úshin 2020 jyldan bastap qoljetimdi bolady.
