MÁMS jarnasyn qandaı sanattaǵy azamattarǵa memleket tóleıdi

ASTANA. QazAqparat – Halyqtyń áleýmettik jaǵynan qorǵalmaǵan toptary úshin medıtsınalyq qyzmet qoljetimdi bolýy úshin ne istelip jatyr? Bul saýalǵa Densaýlyq saqtaý mınıstrligi jaýap berdi, dep habarlaıdy QazAqparat tilshisi.

«Memleket halyqtyń áleýmettik osal toptaryndaǵy azamattardyń 15 jeńldik sanaty úshin mindetti áleýmettik-medıtsınalyq saqtandyrý jarnasyn tóleıdi», - dep atap ótedi mınıstrlikten agenttiktiń resmı saýalyna oraı.

Atalǵan 15 sanatqa kiredi:

1) 18 jasqa deıingi balalar;

2) jumys istemeıtin júkti áıelder;

3) bala úsh jasqa tolǵanǵa deıin ony tárbıelep otyrǵan jumys istemeıtin adamdar;

4) júktilikke jáne bosanýǵa, jańa týǵan balany asyrap alýǵa, sondaı-aq balany úsh jasqa tolǵanǵa deıin kútýge baılanysty demalysta júrgen adamdar;

5) «Altyn alqa», «Kúmis alqa» alqalarymen nagradtalǵan nemese buryn «Batyr Ana» ataǵyn alǵan, sondaı-aq I jáne II dárejeli «Ana dańqy» ordenderimen nagradtalǵan kóp balaly analar;

6) múgedek balaǵa kútim jasaıtyn jumys istemeıtin tulǵalar;

7) bala kezinen múgedekterge kútim jasaýshylar;

8) múgedekter;

9) zeınetkerler men UOS ardagerleri;

10) orta, tehnıkalyq jáne kásiptik, orta bilimnen keıingi, joǵary bilim berý, sondaı-aq joǵary oqý ornynan keıingi bilim berý uıymdarynda kúndizgi oqý nysanynda bilim alatyn adamdar;

11) jumyssyz retinde tirkelgen tulǵalar;

12) jumys istemeıtin memlekettik ataýly áleýmettik kómek alýshylar;

13) jumys istemeıtin oralmandar;

14) qaýipsizdigi barynsha tómen mekemelerdi qospaǵanda, qylmystyq-atqarý júıesi mekemelerinde sot úkimi boıynsha jazasyn ótep júrgen adamdar;

15) tergeý ızolıatorlaryndaǵy adamdar.