MÁMS: Túrkistan oblysynda koronovırýs nemese pnevmonııamen aýyrǵandar ońaltý qyzmetterin aqysyz alady
TÚRKІSTAN. QazAqparat – Túrkistan oblysynda koronovırýs nemese pnevmonııamen aýyrǵandar ońaltý qyzmetterin aqysyz alady. Osy maqsatta «Áleýmettik medıtsınalyq saqtandyrý qory» KEAQ Túrkistan oblysy boıynsha fılıaly ońaltý qyzmetterin kórsetetin 48 medıtsınalyq uıymmen kelisimshart jasasty, dep habarlaıdy QazAqparat tilshisi.
Oblystyq fılıaldyń málimetinshe, óńirde ońaltý qyzmetterin kórsetetin 17 jeke medıtsınalyq uıym bar. Al, naýqastardy COVID-19-dan keıin qalpyna keltirý birneshe kezeńnen turady. Aýrýhanaǵa jatqyzý kezeńinde qalpyna keltirý sharalarynyń kesheni bastalyp, olar tynys alýdy qalypqa keltirýge jáne asqynýlardyń damýyn azaıtýǵa bayttalan. Atalǵan uıymdarda turǵyndardyń ómir súrý sapasyn jaqsartyp, mazasyzdyq pen depressııa belgilerin jeńildetýge bolady. Árbir naýqas aýrýhanadan shyqqannan keıin patologııanyń bolýyna baılanysty medıtsınalyq ońaltýdyń 2-kezeńine nemese 3-kezeńge jiberiledi. ıAǵnı, ambýlatorııalyq-emhanalyq uıymdarda, kúndizgi jáne táýliktik statsıonarlarda, ońaltý ortalyqtarynda, sanatorıı-kýrorttyq uıymdarda, úıdegi statsıonarlarda nemese qashyqtyqtan júrgiziledi. Sonymen qatar, naýqastarǵa psıhologııalyq qoldaýlar kórsetiledi.
«Eger naýqasta koronavırýstyq ınfektsııa anyqtalyp, qannyń ottegimen qanyǵýy 95% - dan tómen bolsa qalpyna keltirýge jiberiledi. Eger, naýqastyń jaǵdaıy aýyr bolsa, 3 kezeńge joldanady. Sondaı-aq, úılerinde emdelgen azamattar da 3 kezeńde ońaltýdy alady. Olar mýltıdıstsıplınarly toptyń baǵalaýynan ótýi qajet», - deıdi «Áleýmettik medıtsınalyq saqtandyrý qory» KEAQ Túrkistan oblysy boıynsha fılıalynyń bas sarapshysy Aıjan Serdalıeva.
Jýyrda Túrkistan qalalyq emhanasynan koronovırýstan jazylǵandardy ońaltý ortalyǵy jumysyn bastady. Ortalyqta 19 naýqasqa ıngalıatsııa, parafınoterapııa, emdik massaj, velotrenajer syndy emdik sharalary kórsetilip jatyr.
«Aldaǵy ýaqytta munda magnıtti terapııa jáne basqa da medıtsınalyq apparattarmen tolyqtyrylatyn bolady. Ortalyqtyń vırýsologııalyq zerthanasynda Otyrar, Báıdibek, Sozaq aýdandary men Kentaý, Túrkistan qalalaryndaǵy emdeý mekemelerinen alynǵan PTR synamalaryna taldaý jasalýda. Nátıjeleri ortalyqtandyrylǵan júıe arqyly azamattardyń jeke málimet júıesine engiziledi», – deıdi Túrkistan qalalyq emhanasynyń bas dárigeri Rıymbek Tasyrbaev.
