MÁMS tóraǵasy qarjy jymqyrý máselesine qatysty pikir bildirdi

Osyǵan qatysty Áleýmettik medıtsınalyq saqtandyrý qorynyń basqarma tóraǵasy áleýmettik jelide Gúlmıra Sábdenbek pikir bildirgen.

Onyń aıtýynsha Quqyq qorǵaý organdary tergep jatqan qazirgi epızodtar júıeniń burynǵy jumys kezeńderine (2024-2025 jj.) qatysty. Materıaldardyń edáýir bóligin qordyń ózi baqylaý is-sharalary barysynda anyqtap, protsestik sheshimder qabyldaý úshin quqyq qorǵaý organdaryna joldaǵan.

— Sońǵy kúnderi Áleýmettik medıtsınalyq saqtandyrý qorynyń qyzmetine qatysty ótkir pikir men aıyptaýlar jıi aıtylyp júr. Mıllıondaǵan azamattyń qarajaty týraly sóz bolǵandyqtan, qoǵamnyń nazar aýdaryp, tolyq ashyqtyqty talap etýi — zańdy qubylys.

Sonymen qatar barlyq mán-jaıdy eskerý mańyzdy. Qazirgi tańda tergelip jatqan epızodtardyń edáýir bóligi qordyń baqylaý jumystary barysynda anyqtalyp, keıin materıaldar quqyq qorǵaý organdaryna joldanǵan, — dedi ol.

Zań buzý is júzinde kórsetilmegen medıtsınalyq kómekti kórsetý, qyzmet kólemderin qosyp jazý, azamattardy jalǵan bekitý, patsıentterdiń derbes derekterin zańsyz paıdalaný, sondaı-aq MÁMS qarajatyn zańsyz alýdyń basqa da shemalarymen baılanysty.

— 2026 jyldyń birinshi jartyjyldyǵynyń qorytyndysy boıynsha qor jalpy somasy 4,5 mlrd teńge bolatyn zań buzý jónindegi 72 materıaldy quqyq qorǵaý organdaryna joldady. Olardy qaraý nátıjesinde 27 qylmystyq is tirkelip, olar boıynsha keltirilgen zalaldyń belgilengen mólsheri 3,7 mlrd teńge. Salystyrý úshin, 2025 jyldyń tolyq kezeńinde 630 mln teńge somasyna 73 materıal joldanyp, olar boıynsha 8 qylmystyq is tirkelgen, — delingen qor habarlamasynda.

Qordyń málimetinshe bul rette anyqtalǵan zań buzý kóleminiń artýy teris paıdalaný faktileriniń kóbeıgenin emes, qordyń baqylaý fýnktsııasynyń sapaly kúsheıgenin, taldamalyq quraldardyń jetildirilgenin jáne árbir anyqtalǵan faktini quqyqtyq baǵa berýge deıin jetkizý jumysynyń kúsheıgenin kórsetedi.

Quqyq qorǵaý organdarymen ózara is-qımyldy kúsheıtýmen qatar, qor qarjylyq baqylaý jumystaryna ózgeris engizip jatyr.

— Eger buryn zań buzýdy anyqtaý kezindegi negizgi jumys qarajat aýdarylǵannan keıin oryndalsa, jańa model aldyn alý sharalaryn medıtsınalyq uıymǵa tólem júrgizgenge deıin oryndaýdy kózdeıdi.

Qordyń damý strategııasyn iske asyrý sheńberinde Qalqan IT-platformasyn, avtomattandyrylǵan antıfrod júıesin jáne derekterdi taldaýdyń táýekelge baǵdarlanǵan algorıtmderin qamtıtyn qarjylyq baqylaýdyń biryńǵaı tsıfrlyq ekojúıesi engizilip jatyr.

Jańa tsıfrlyq quraldar naqty ýaqyt rejıminde medıtsınalyq kómektiń qalyptan tys kólemderin, jappaı negizsiz jazbalardy, medıtsınalyq qyzmet jetkizýshilerdiń jalǵan qyzmet belgilerin, kórsetilgen qyzmetter kólemin jasandy túrde ulǵaıtýdy jáne basqa da táýekel stsenarıılerin anyqtaýǵa múmkindik beredi, — delingen habarlamada.

Jańa modeldiń mańyzdy elementi qoǵamdyq baqylaý tetikterin damytý bolmaq. Árbir azamat óziniń atyna tirkelgen medıtsınalyq qyzmetterdi jedel tekserip, is júzinde mundaı kómek kórsetilmegen jaǵdaılar týraly habarlaı alady.

Mundaı ótinishter tekserýler júrgizýge arnalǵan táýekel ındıkatorlarynyń qosymsha kózi retinde paıdalanyldy.

Áleýmettik medıtsınalyq saqtandyrý qorynyń basqarma tóraǵasy Gúlmıra Sábdenbek baqylaýdy kúsheıtý bir rettik naýqan emes, densaýlyq saqtaýdaǵy qarjylyq basqarýdyń júıeli reformasy ekenin atap ótti.

— Qor baqylaý tásilin túbegeıli ózgertýge bet burdy.  Zań buzýdy keıin anyqtaýdyń ornyna olardy aldyn alý sharalaryn qolǵa alamyz. Bizdiń maqsatymyz medıtsınalyq uıymdarǵa qarajat aýdarylǵanǵa deıin negizsiz tólemderdiń jasalýyna jol bermeý. Bul árbir teńgeniń maqsatty jumsalýyn qamtamasyz etip, azamattardyń MÁMS júıesine senimin nyǵaıtýǵa múmkindik beredi, — dep atap ótti Gúlmıra Sábdenbek.

Búgingi kúni 5,5 mln astam qazaqstandyq MÁMS jarnasyn tólep, aýdarym jasaıdy. Jańa baqylaý júıesi olardyń árqaısysyna MÁMS qarajaty tek naqty kórsetilgen medıtsınalyq kómekke jumsalyp, maqsatty baǵytta paıdalanǵanyna qatań baqylaý jasalǵanyna senimdi bolýǵa múmkindik beredi.