MÁMS tólemeıtinderge kólik júrgizýge tyıym salynýy múmkin

Búgin Májilistegi Úkimet saǵatynda QR Densaýlyq saqtaý mınıstri Ajar Ǵınııat MÁMS júıesine qandaı ózgerister engizý kerektigin aıtty, dep habarlaıdy QazAqparat tilshisi.

«Qazirgi kezde qarjy júıesi aktýarlyq esepteýlerge sáıkes ósip kele jatqan shyǵystardy eńsere almaǵandyqtan qor óz mindettemelerin bolashaqta tolyq oryndaı almaıdy dep boljap otyr. Júıeniń uzaqmerzimdi qarjylyq ornyqtylyǵyn qamtamasyz etý úshin kelesi qajet sharttardy eskerý qajet. Birinshiden, 2025 jyldan bastap ár azamat mindetti salyqtyq deklaratsııasyn tapsyrady. Sol arqyly saqtandyrylmaǵan azamattardyń tabysy belgili bolady jáne shamamen 700 myń adamdy MÁMS júıesine engizý eskerilgen», - dedi A. Ǵınııat.

Onyń aıtýynsha, sonymen qatar tabysy tómen ári aýylda turatyn shamamen 1,5 mln adam bıýdjettik qarajat arqyly saqtandyrylady.

2026 jylǵa qaraı bul halyqtyń keminde 95 paıyzyn qamtýǵa múmkindik beredi.

Munymen qosa, memleket pen jumys berýshilerdiń jarnalarynyń mólsherlemelerin kezeń-kezeńimen kóterý qarastyrylǵan.

«Budan basqa, saqtandyrylmaǵan adamdarǵa densaýlyq jáne osy salaǵa qatysty memlekettik qyzmetterdi alý kezinde shekteý engizý usynylady. Máselen, kólik júrgizý, qarý-jaraq saqtaý jáne basqa da baǵyttarda osyndaı shekteýlerdi qarastyrǵan jón dep sanaımyz», - dedi mınıstr.

Onyń sózine qaraǵanda, MÁMS júıesine qatysty bıýdjettik qarjylandyrýdy kezeń-kezeńimen ulǵaıtý pysyqtalyp otyr. 

Osy sharttardy oryndaǵan kezde qordyń ornyqtylyǵy saqtalady.