MÁMS: Shyǵys Qazaqstan oblysynda 217 myńǵa jýyq adam em aldy
ÓSKEMEN. QazAqparat – Shyǵys Qazaqstan oblysynda Mindetti áleýmettik medıtsınalyq saqtandyrý júıesi aıasynda 217 myńǵa jýyq adam em alǵan, dep habarlaıdy QazAqparat tilshisi.
«Áleýmettik medıtsınalyq saqtandyrý qory» KEAQ ShQO boıynsha fılıalynyń dırektory Ǵalymjan Ábilovtyń aıtýynsha, bıylǵy 11 aıdyń qorytyndysy boıynsha medıtsınalyq ońaltý, konsýltatsııalyq-dıagnostıkalyq kómek, profılaktıkalyq qarap-tekserý syndy qyzmetter kórsetý aıtarlyqtaı artyp otyr. Osy jyly MÁMS aıasynda 217 myńǵa jýyq adam em aldy. Táýliktik statsıonarda 150 myńnan astam patsıent emdeldi. Onyń ishinde 280 patsıentke joǵary tehnologııalyq kómek kórsetilgen. Infektsııalyq bólimshelerde KVI-men aýyratyn 9 myńǵa jýyq n aýqas tegin medıtsınalyq kómektiń kepildendirilgen kólemi aıasynda emdeldi.
MÁMS júıesin iske asyrýdaǵy ózekti máselelerdiń biri – saqtandyrylmaǵan azamattardyń kórsetkishi. 1 jeltoqsandaǵy jaǵdaı boıynsha Shyǵys Qazaqstan oblysynda 1,1 mln-nan astam adam nemese 81,6% saqtandyrylǵan. Al 251 myń adam áli saqtandyrylmady, bul - oblystyń árbir besinshi turǵyny. Sondyqtan qor fılıaly azamattardan óziniń saqtandyrý mártebesin anyqtaýdy suraıdy.
Ótken jyldyń qyrkúıek aıynan bastap qordyń 1406 nómiri boıynsha «Biryńǵaı baılanys ortalyǵy» jumys isteı bastaǵan. Al 2020 jyldyń 1 qańtarynan beri ortalyqtyń jumysy táýlik boıǵy rejımge aýystyryldy. Azamattardyń ótinishterin óńdeýdiń úsh deńgeıli modeli ázirlendi.
«Bıyl ShQO turǵyndarynan 26 myńǵa jýyq ótinish kelip tústi, onyń 25 myńy konsýltatsııalyq sıpatta bolǵan. Budan bólek, 467 shaǵym, 505 alǵys, 11 usynys keldi. Olardyń barlyǵy tıisti merzimde qaraldy», - dedi Ǵalymjan Ábilov.
