MÁMS: saqtandyrýdyń jańa tártibi qoldanysqa engizildi

ALMATY. QazAqparat- Qyrkúıek aıynan bastap ózin-ózi jumyspen qamtyǵan turǵyndar úshin saqtandyrýdyń jańa tártibi qoldanysqa engiziledi. Zańǵa engen ózgeristerge sáıkes, budan bylaı saqtandyrý júıesine qosylý úshin aldaǵy 12 aıǵa jarna tóleýge bolady. Bul týraly Medıtsınalyq saqtandyrý qory Almaty fılıalynyń basshysy Tileýhan Ábildaevt málim etti, dep habarlaıdy QazAqparat tilshisi.

Onyń aıtýynsha, saqtandyrylmaǵan patsıentter medıtsınalyq kómekti paıdalaný úshin qyrkúıek aıynan bastap 2023 jyldyń qyrkúıegine deıin jarna aýdara alady. Sol arqyly olar aldaǵy bir jylǵa ózin-ózi saqtandyrý múmkindigine ıe bolmaq.

Qazirgi tańda óz betinshe tólem jasaýshylardyń aı saıynǵy jarnasy 3000 teńgeni qurap otyr.

Fılıal basshysy Tileýhan Ábildaevtyń sózinshe, búginde Qazaqstanda 3 mln astam adam saqtandyrylmaǵan.

«Saqtandyrylmaǵan azamattar táýekel tobyna jatady. Óıtkeni olar shuǵyl jaǵdaılardy qospaǵanda, josparly medıtsınalyq kómekti paıdalana almaıdy. Atalǵan ózgerister osynyń aldyn alý maqsatynda jáne halyqtyń suranysy boıynsha engizilgen bolatyn. Nátıjesinde saqtandyrylmaǵan halyqtyń shamamen 30%-y jańa tólem túrin paıdalanady degen boljam jasalyp otyr. Sonymen qatar ótken aılarǵa bereshegi joq azamattar úshin MÁMS jarnasyn aı saıyn tóleý quqyǵy saqtalady», - dedi Tileýhan Ábildaev.

Esterińizge sala ketsek, buǵan deıin saqtandyrý paketindegi qyzmetterdi paıdalaný úshin derbes tóleýshiler ótken 12 aıdyń jarnasyn tóleýge mindettelgen bolatyn.

Medıtsınalyq kómek sapasyna qanaǵattanbaǵan jaǵdaıda azamattar emhananyń patsıentterdi qoldaý qyzmetine júgine alady.

Eger máseleni sol jerde sheshý múmkin bolmasa, MSQ-nyń fms.kz resmı saıty, 1406 baılanys ortalyǵy, Qoldau 24/7 mobıldi qosymshasy jáne Telegram-daǵy SaqtandyryBot arqyly shaǵym qaldyrýna bolady.