MÁMS: Óz mártebeńdi qalaı anyqtaýǵa bolady

QARAǴANDY. QazAqparat - Áleýmettik medıtsınalyq saqtandyrý júıesinde óz mártebeńizdi 1 mınýt ishinde tekserýge bolady. Mártebeni tekserý úshin telefon nemese kompıýter bolsa jetkilikti, dep habarlaıdy QazAqparat tilshisi.

Mártebeni tekserýdiń eń jyldam 3 joly bar: № 1 ádis - fms.kz saıtyna kirip, jypylyqtap turǵan «Mártebeni anyqtaý» plagınin basý – JSN engizý – daıyn.

№ 2 ádis - Telegram qosymshasynda SaqtandyryBot-chatyn tabyńyz. «Start»-ty basyńyz – tildi tańdańyz – «Saqtandyrylý mártebesin anyqtaý» qosymsha paraǵyn tańdańyz – JSN engizińiz – daıyn.

№ 3 ádis - WhatsApp messendjerinde 87001031406 nómiri boıynsha – tildi tańdańyz – odan ári nusqaýlyq boıynsha «4» tsıfrin (mártebesin anyqtaý) basyńyz – JSN engizińiz – daıyn.

«31 naýryzǵa deıin eldiń barlyq turǵyndary «shartty túrde saqtandyrylǵan» bolyp tabylady. Bul ýaqyt azamattardyń barlyǵyna óz mártebesin anyqtaý úshin turaqty jarnalar jasaı bastaý úshin beriledi. Sebebi 2020 jylǵy 1 sáýirden bastap medıtsınalyq saqtandyrýǵa kiretin qyzmetterdi, sonyń ishinde, qymbat turatyn zertteýler, operatsııalardy tegin alýǵa tek saqtandyrylǵan, dálirek aıtar bolsaq, turaqty jarnalardy ózderi jasaıtyn, jalaqydan jarnalar ustalatyn jáne jeńildik kategorııalaryna kiretin jáne memleket saqtandyrǵan azamattar ǵana quqyly bolady», - dedi medsaqtandyrý Qory Qaraǵandy fılıalynyń aqparattyq-túsindirý jumystary bóliminiń basshysy Svetlana Şetkına.