MÁMS: Ótken jyly almatylyq jumys berýshiler 21 mlrd teńge jarna aýdardy

ALMATY. QazAqparat - 2018 jyly Medıtsınalyq saqtandyrý qoryna Almaty qalasynan 21 mlrd teńgege jýyq jarna tústi. Al, júıe iske qosylǵan 2017 jyldyń 1 shildesinen beri almatylyqtar qorǵa 28 mlrd teńgeden astam qarjy quıǵan. Bul týraly «Áleýmettik medıtsınalyq saqtandyrý qory» KEAQ Almaty fılıaly basshysy Tileýhan Ábildaev habarlady.

Fılıal basshysynyń aıtýynsha, bul - respýblıka boıynsha túsken jarnanyń 21 paıyzy. Jalpy, Almaty qalasy tólengen jarna kólemi jaǵynan elimiz boıynsha kósh bastap tur.

Esterińizge sala ketsek, 2019 jyly jarnany jumys berýshiler ǵana tóleıdi. Bıyl olar jumysker tabysynyń 1,5 paıyzy kóleminde jarna aýdarady. Aýdarym jumys berýshiniń óz qarajaty esebinen jasalady. Al, jeke kásipkerler 2019 jyly ózi úshin jarna aýdarý mindetinen bosatylǵan.

«Sońǵy ózgeristerge sáıkes, elimizde bıyldan bastap biryńǵaı jıyntyq tólem júıesi engizildi. Biryńǵaı tólemge ózge áleýmettik tólemderden basqa MÁMS jarnasy da engizilgen. Ol jıyntyq tólemdi tóleýshilerge saqtandyrý júıesine qatysyp, MÁMS sheńberinde kórsetiletin medıtsınalyq qyzmetterdi paıdalanýǵa múmkindik bermek. Tólemdi jeke tulǵalarǵa qyzmet kórsetetin, jaldamaly jumysshylar eńbegin paıdalanbaı tabys tabatyn jeke tulǵalar aýdarady. Jıyntyq tólem somasy respýblıkalyq mańyzy bar qala turǵyndary úshin - 1 AEK (aılyq eseptik kórsetkish), aýyl-aýdan turǵyndary úshin - 0,5 AEK quramaq (2019 jyly 1 AEK - 2525 teńgege teń)» delingen baspasóz baıanynda.

Eske salaıyq, jınaqtalǵan qarjy Ulttyq bankte saqtalady. Bolashaqta MÁMS paketi sheńberindegi qyzmetter aqysyn tóleýge jumsalady. Elimizdiń bas bankimen qarjyny senimgerlik basqarý týraly kelisim bekitilgen.