MÁMS: memleket jarnalarynyń mólsheri birtindep artady
ASTANA. KAZINFORM — Medıtsınalyq saqtandyrýda memlekettiń, jumys berýshilerdiń jáne azamattardyń ortaq jaýapkershiligi kúsheıtilmek. Bul týraly búgin Parlament Májilisinde mindetti áleýmettik medıtsınalyq saqtandyrý máseleleri zań jobasyn tanystyrý kezinde QR Densaýlyq saqtaý mınıstri Aqmaral Álnazarova aıtty.
- Júıeniń qarjylyq turaqtylyǵyn qamtamasyz etý úshin zań jobasynda memlekettiń, jumys berýshilerdiń jáne azamattardyń ortaq jaýapkershiligin arttyrýǵa baǵyttalǵan eki bastama usynylady. Birinshiden, bul qyzmetkerlerdiń jarnalaryn esepteý bazasynyń joǵarǵy shegin arttyrý. Ekinshiden, MÁMS júıesine memleket jarnalarynyń mólsherlemelerin ulǵaıtý. 2026 jylǵy 1 qańtardan bastap MÁMS júıesine jarnalardy esepteý úshin bazanyń joǵarǵy shegin arttyrý (10-nan 50 eń tómengi jalaqyǵa deıin) usynylady. Bul ózgerister barlyq jaldamaly jumysshylar men olarǵa jumys berýshilerdiń shamamen 9 paıyzyna ǵana (508 myń adam) áser etedi. Sebebi, qazir tabysy joǵary adamdar proportsıonaldy túrde az tóleıdi, - dedi A. Álnazarova.
Ekinshi kezeńde – 2027 jyldan bastap MÁMS-ke memleket jarnalarynyń mólsherin birtindep arttyrý eskerilgen.
- Osylaısha, 2015 jyly Qazaqstan Respýblıkasynyń MÁMS týraly Zańynyń birinshi redaktsııasynda belgilengen bastapqy qarjy modeline ishinara oralýdy bastaımyz. Bul óz kezeginde jumysshylar men jumys berýshiler úshin jarnalar mólsherin kóbeıtpeýge, densaýlyq saqtaý júıesin uzaq merzimdi perspektıvada qoldaýǵa múmkindik beredi. ıAǵnı, biz jumysshylar men jumys berýshilerdiń qazirgi kezde tólep otyrǵan jarnalaryn ózgerissiz qaldyrýdy usynyp otyrmyz, - dedi mınıstr.
Budan buryn habarlanǵandaı, búgin Parlament Májilisinde «Qazaqstan Respýblıkasynyń keıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» zań jobasy tanystyryldy.
Sonymen qatar, jumyssyz adamdardyń MÁMS jarnalaryn tóleý shyǵystaryn jergilikti bıýdjetterge júkteý usynyldy.