«MÁMS mártebesin alyp beremiz»: deldal qyzmetin paıdalaný qanshalyqty durys
ASTANA. KAZINFORM – Messendjerlerdegi turǵyn úı chattarynda «MÁMS júıesinde saqtandyrylǵan klıent mártebesin alýǵa kómektesemiz» degen habarlamalar jıi kezdesedi. Deldaldar máseleni tez ári esh qıyndyqsyz sheshýge ýáde berip, ol úshin belgili bir somada aqy suraıdy. Mundaı qyzmetter zańdy ma? Bul týraly Áleýmettik medıtsınalyq saqtandyrý qory (ÁMSQ) Kazinform agenttiginiń saýalyna jaýap berdi.
Jedeldik deldaldyń arqasynda emes
Deldaldar qyzmet kórsetý jyldamdyǵyn usynystyń basty artyqshylyǵy retinde ataıdy. Rasynda da, «MÁMS-ti úsh kúnde rásimdep beremiz» degen ýáde kim-kimdi qyzyqtyratyny anyq. Alaıda ÁMSQ málimetinshe, júıege qajetti aqparat túsip, óńdelgennen keıin, «saqtandyrylǵan» mártebesi úsh jumys kúni ishinde deldalsyz-aq avtomatty túrde beriledi.
– Zańnamada saqtandyrylǵan mártebesin deldaldar arqyly alý nemese ony jedel rásimdeý qarastyrylmaǵan. Mártebe qor júıesine derekter, sonyń ishinde tólemder týraly nemese azamattyń jeńildik sanatyna jatatyny týraly aqparat túskennen keıin avtomatty túrde beriledi, – delingen habarlamada.
Demek, Qordyń aqparattyq júıesine deldal kire almaıdy. Onyń derekterdi ózgertýge, sheshim qabyldaýǵa yqpal etýge jáne tólemderdiń óńdelý merzimin qysqartýǵa eshqandaı quzireti joq.
Deldaldar ýáde etetin «úsh kún ýaqyt» – arnaıy aqyly qyzmet emes, júıede onsyz da qarastyrylǵan qalypty merzim. Sondyqtan otandastarymyz olarǵa tólengen aqsha eshqandaı erekshe quqyq nemese artyqshylyq bermeıtinin eskergeni jón.
Saqtandyrý mártebesin jáne tólemder týraly aqparatty azamattar tikeleı ÁMSQ-ǵa júginý arqyly teksere alady.
MÁMS mártebesin óz betimen qalaı alýǵa bolady
Eger azamat jumys istemese jáne jeńildik sanatyna jatpasa, ol jarnalardy óz betinshe tóleı alady.
– 2026 jyly derbes tóleýshi úshin aı saıynǵy jarna mólsheri – 4 250 teńge, – dep habarlady qor.
Sonymen qatar, saqtandyrylǵan mártebesin alý úshin úzdiksiz 12 aıdyń jarnasy tólenýi tıis. Muny eki tásilmen jasaýǵa bolady:
- ótken kezeńdegi tólenbegen aılar úshin (tólem jasalǵan kúnge deıingi 12 aıǵa deıin) jarnany óteý;
- dál qazirgi sátten bastap birden aldaǵy 12 aıdyń jarnasyn tóleý.
Sonda 2026 jyly 12 aıǵa saqtandyrý quny 51 myń teńge bolady.
Alaıda eskerilýi kerek mańyzdy jaıt bar. Ár aı úshin tólem jeke-jeke júrgiziledi jáne tóleý barysynda kezeń durys kórsetilýi qajet.
Bul úshin eshqandaı deldal nemese tamyr-tanys qajet emes. Banktiń mobıldi qosymshasy, ekinshi deńgeıli bank, «Qazposhta» bólimsheleri nemese ózine-ózi qyzmet kórsetý termınaldary arqyly tólem jasaýǵa bolady.
Tólemderdi «Azamattarǵa arnalǵan úkimet» memlekettik korporatsııasy óńdegennen keıin, málimetter ÁMSQ júıesine túsedi. Qajetti kezeń úshin barlyq tólemder bolsa, «saqtandyrylǵan» mártebesi úsh jumys kúni ishinde avtomatty túrde beriledi.
Deldaldardyń qyzmeti zańsyz ba
Shyn máninde, deldal ári ketse keńes bere alady. Biraq ÁMSQ atalǵan qyzmetke qajettilik bolmaǵandyqtan, ondaı usynystardan bas tartý kerektigin málimdedi.
Sonymen birge, qor áleýmettik jeliler men messendjerlerdegi álgindeı habarlandyrýlardy baqylap otyrady.
– Eger jalǵan eńbek qatynastaryn rásimdeý, jalǵan málimet usyný, jeke derekterdi zańsyz paıdalaný nemese basqa da quqyqqa qaıshy áreketterdiń belgileri anyqtalsa, materıaldar quqyq qorǵaý jáne basqa da ýákiletti memlekettik organdarǵa joldanady, – dep habarlady ÁMSQ.
Al zań buzýshylyqtyń bolǵanyn nemese bolmaǵanyn tek ýákiletti organdar ǵana anyqtaı alady.
«JSN-di berseńiz de, SMS-kod pen bank derekterin aıtpańyz»
Ózińiz isteı alatyn qyzmet úshin deldalǵa aqsha tóleý aqylǵa qonymdy iske jatpaıdy. Biraq basty másele ol emes. Bóten adam sizge MÁMS mártebesin rásimdeý úshin jeke nemese bank derekterińizdi suraǵany qaýipti.
Jarnany óz betinshe tóleý úshin tek JSN, tólem somasyn jáne tólem kezeńin engizý qajet. ÁMSQ mynadaı málimetterdi eshkimge berýge bolmaıtynyn málimdep, azamattarǵa keńes berdi:
- bank kartasynyń derekteri;
- CVV-kod;
- parolder;
- SMS arqyly keletin rastaý kodtary;
- ETsQ kilti men onyń qupııasózi;
- mobıldi bankıngke qoljetimdilik;
- memlekettik aqparattyq júıelerdegi akkaýnttarǵa qoljetimdilik.
Óıtkeni, MÁMS mártebesin rásimdeý úshin mundaı derekterdiń qajeti de joq, júıe olardy engizýdi suramaıdy.
– Atalǵan aqparatty bógde adamdarǵa berý esepshottaǵy aqshadan aıyrylý, jeke derekterdiń zańsyz paıdalanylýy jáne basqa da quqyqqa qaıshy áreketterge ákep soǵýy múmkin, – dep eskertti ÁMSQ.
Eger azamat deldalǵa aqsha tólep, aldandym dep kúdiktense, ishki ister organdaryna júgingeni abzal Al bank derekterin bógde adamǵa bergen bolsa, barynsha tezirek bankke habarlasýy qajet.
Sondaı-aq, ár kisi MÁMS mártebesi men tólemder týraly aqparatty myna resýrstar arqyly óz betinshe teksere alady:
- ÁMSQ-nyń resmı saıty (https://msqory.kz/kk/);
- eGov.kz portaly (https://egov.kz/cms/kk);
- SaqtandyryBot Telegram-boty (https://web.telegram.org/a/#1270517960)
- Qoldau 24/7 qosymshasy;
- bank mobıldi qosymshalary.
Eske salaıyq, buǵan deıin ózin-ózi jumyspen qamtyǵandardyń shamamen 40%-y MÁMS jarnasyn qalaı tóleýdi bilmeıtinin jazǵanbyz.
Sondaı-aq, QR Densaýlyq saqtaý mınıstrligi MÁMS pen TMKKK júıesindegi qyzmet kórsetýshilerge qoıylatyn talaptardy kúsheıtedi.
