MÁMS: Qostanaı oblysynyń turǵyndary 1 mlrd 292 mln teńge aýdardy

QOSTANAI. QazAqparat – Qostanaı oblystyq Óńirlik kommýnıkatsııalar qyzmetinde medıtsınalyq saqtandyrý júıesiniń jumys qorytyndysyna arnalǵan baspasóz máslıhaty ótti, dep habarlaıdy QazAqparat.

Áleýmettik medıtsınalyq saqtandyrý qory oblystyq fılıalynyń dırektory Sáýle Aımuhambetovanyń aıtýynsha, 2017 jyldyń 1 shildesinen bastap óńirde medıtsınalyq saqtandyrýǵa 11 mlrd 387 mln teńge jarna aýdaryldy. Onyń ishinde osy jyly 229 769 adamnan 1 mlrd 292 mln teńge somasyna jarna men aýdarymdar túsken.

«Medıtsınalyq saqtandyrýdy engizý qysqa merzim ishinde nátıjesin berýde. Mysaly, eger MRT túsirý boıynsha 2019 jyldyń eki aıynda 167 qyzmet kórsetilse, al bıyl qańtar aıynda ǵana 186 qyzmet iske asqan. Sonymen qatar, osy jyldyń qańtar-aqpan aılarynda oblystyq aýrýhanada 59 ota jasaldy. Joǵary tehnologııalyq medıtsınalyq qyzmetter boıynsha jyl basynan beri tórt operatsııa sátti aıaqtaldy. 2019 jyly meıirbıkelik kútim tósekterinde emdelýshilerge tek aqyly negizde kómek kórsetilse, ótken jyldyń 2 aıynda barlyǵy 13 naýqas qana aqyly emdeldi. Bul qyzmetterdiń barlyǵy MÁMS esebinen kórsetiledi», – deıdi Sáýle Aımuhambetova.

Oblys turǵyndary kepildendirilgen tegin medıtsınalyq kómekti tolyǵymen paıdalana alady. Buǵan áleýmettik mańyzy bar syrqattardy emdeý ǵana emes, ekpe egý, shuǵyl kómek, jedel járdem men sanıtarlyq avıatsııa qyzmeti kiredi. Kez kelgen adam shuǵyl kórsetilimder boıynsha statsıonarlyq ári ambýlatorlyq kómekke júgine alady.