MÁMS: Qostanaı oblysynyń 180 turǵynyna qymbat ota tegin jasaldy
Qostanaı oblysynyń turǵyndaryna medıtsınalyq kómek 60 mekemede kórsetiledi, onyń 19-y – jeke menshik. Bıyl óńirdiń Densaýlyq saqtaý salasyn qarjylandyrýǵa Covid-19-ǵa bólingen qarajatty eseptemegende, 56,5 mlrd teńge qarastyrylǵan. MÁMS esebinen 16,8 mlrd teńge baǵyttaldy.
«2020 jyly qarjylandyrý kólemi skrınıngter boıynsha 3 ese, joǵary tehnologııalyq medıtsınalyq qyzmetter sanatynda 12 ese, medıtsınalyq ońaltý boıynsha 27 ese ósti. KT jáne MRT júrgizýdi qarjylandyrý ótken jyldan 3,2 ese artyq. Qazirgi ýaqytta Qostanaı oblysynda 6 KT jáne 5 MRT apparaty bar. 2020 jyldyń qarasha aıynda Rýdnyı qalalyq kópsalaly aýrýhanasyna taǵy bir MRT apparaty jáne Qostanaı oblystyq aýrýhanasyna, Arqalyq óńirlik aýrýhanasyna, Rýdnyı qalalyq kópsalaly aýrýhanasyna jáne Jitiqara aýdandyq aýrýhanasyna 4 KT apparaty satyp alyndy.
2020 jyldyń 10 aıynda medıtsınalyq uıymdarǵa halyqqa medıtsınalyq qyzmet kórsetkeni úshin 40 mlrd 347 mln teńge tólendi. Shyǵyndardyń basym bóligi statsıonarda mamandandyrylǵan medıtsınalyq kómekti qamtamasyz etýge jumsaldy. Jalpy, táýliktik statsıonarlarda – 45147, kúndizgi statsıonarlarda 64620 patsıent, aýyl statsıonarlarynda 32153 adam em qabyldady», - deıdi «Áleýmettik medıtsınalyq saqtandyrý qory» KEAQ Qostanaı oblysy boıynsha fılıalynyń dırektory Sáýle Aımuhambetova.
Qarjylandyrýdyń ósýi halyqqa medıtsınalyq qyzmet kórsetýdiń sapasyn arttyrýǵa múmkindik berdi. Máselen, qarajattyń kóbeıgeni aımaqta býyn aýystyrý operatsııasyn jasaýǵa yqpal etti. Jyl basynan beri dál osyndaı ota oblystyń 180 turǵynyna jasaldy. Olapdyń bári MÁMS júıesinde tirkelgen.
«Tize nemese jambas aýystyrý operatsııasy mıllıon teńgeden asady, biraq saqtandyrylǵan patsıentter úshin bul tegin. 2019 jyly bizdiń oblysta 35 mln teńgege osyndaı 37 operatsııa júrgizildi. Bıyl 180 adamǵa tegin ota jasalyp otyr. Osy jyly «Halyq densaýlyǵy jáne densaýlyq saqtaý júıesi týraly» Kodekske túzetýler engizildi. Nátıjesinde saqtandyrylmaǵan patsıentterge shuǵyl medıtsınalyq kómek kepildendirilgen pakette kórsetiletin boldy. Muny halyq túsinbeı, jeke emhanalarǵa júginip jatady», - dep túıdi sarapshy.
