MÁMS qorynyń basshylyǵyna isker adamdy qoıý kerek – Prezıdent

NUR-SULTAN. QazAqparat – Memleket basshysy Qasym-Jomart Toqaev Mindetti áleýmettik medıtsınalyq saqtandyrý qorynyń basshylyǵyna laıyqty adamdy qoıý máselesine qatysty aıtty, dep habarlaıdy QazAqparat tilshisi.

«Keıingi kezde Mindetti áleýmettik medıtsınalyq saqtandyrý qorynyń aınalasynda ártúrli áńgime órship ketti. Menińshe onyń basshylyǵyna iskerirek ári jaýaptyraq adamdy qoıý kerek. Ol qordyń aınalasynda eshqandaı sybys pen áńgime shyqpaýy tıis. Aınalyp kelip osyndaı áńgimeniń shyǵýyna ózimiz sebepker bolyp otyrmyz. Úkimet tarapynan qordyń jumysyna taldaý júrgizilip, ol qanshalyqty tıimdi ári sátti degen suraq zerttelýi tıis», - dedi Qasym-Jomart Toqaev Úkimettiń keńeıtilgen otyrysynda.

Eske sala ketsek, Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen búgingi otyrysynda MÁMS qory men «SQ Farmatsııa» basshylaryn jumystan shyǵarýdy tapsyrǵan bolatyn.

«Týyndaǵan qıyndyqqa kinálilerdiń bárine qatysty tergeý júrgizý kerek. Jaýapkershilikke tartqan durys. MÁMS qory men «SQ Farmatsııa» basshylary jumystan shyǵarylsyn. Kerek bolsa tergeý júrgizgen jón», - dedi Qasym-Jomart Toqaev.