MÁMS qoryna túsken qarjynyń besten bir bóligi Almatyǵa tıesili

ALMATY. QazAqparat - MÁMS qoryna túsken qarjynyń besten bir bóligi ońtústik astanaǵa tıesili. Bul týraly onlaın brıfıng barysynda Almaty qalasy Áleýmettik medıtsınalyq saqtandyrý qorynyń basshysy Tileýhan Ábildaev aıtty, dep habarlaıdy QazAqparat tilshisi.

Qor basshysynyń málimetinshe, MÁMS júıesi engizilgen sátten bastap medıtsınalyq saqtandyrý qoryna 655,2 mlrd teńge túsken. Sonymen qatar, barlyq qarajattyń besten bir bóligi Almatyǵa tıesili.

«2017 jyldyń 1 shildesinen, 2021 jyldyń 31 mamyryna deıingi kezeńde Almaty qalasynan MÁMS-ke túsetin túsimderdiń jalpy somasy 1,9 mln adam úshin 121,7 mlrd teńgeden asty», – dedi spıker.

Túsimniń negizgi bóligi nemese 89,7 mlrd teńgeden astamy – jumys berýshilerdiń aýdarymdary, qalǵan 32 mlrd teńge – jeke kásipkerler men azamattyq-quqyqtyq sıpattaǵy sharttar boıynsha jumys isteıtin adamdardyń salymdary.

Sondaı-aq, 2019 jyldyń basynan bastap 200 myńnan astam ózin-ózi jumyspen qamtyǵan almatylyq 462,6 mln teńge kóleminde biryńǵaı jıyntyq tólemin tóledi.

Osy jyldyń 4 aıynyń qorytyndysy boıynsha Almaty qalasynyń turǵyndarynan 103 288 ótinish tústi. Onyń ishinde 157 alǵys hat, 100 myńnan astam keńes bar.

Eske salsaq, medıtsınalyq uıymdar tarapynan quqyqtar buzylǵan jaǵdaıda naýqastar keri baılanys arnalary, atap aıtqanda Qoldau 24/7 mobıldi qosymshasy, 1406 biryńǵaı baılanys ortalyǵy men fms.kz. resmı saıty arqyly Qorǵa ótinish jibere alady. Barlyq ótinishter mindetti túrde qaralady.