MÁMS: Qyzylorda oblysynda 144 ota tegin jasalady

QYZYLORDA. KAZINFORM – Áleýmettik medıtsınalyq saqtandyrý qory Qyzylorda oblystyq fılıalynyń málimetine súısensek, bıyl óńirdiń densaýlyq saqtaý júıesine 117,4 mlrd teńge qarjy bólindi. Onyń 57,1 mlrd teńgesi turǵyndarǵa MÁMS aıasynda qyzmet kórsetýge jumsaldy.

Jyl basynan beri medıtsınalyq uıymdarda MÁMS esebinen 2 mln-nan astam konsýltatsııalyq-dıagnostıkalyq qyzmet kórsetilgen.

– Qarjylandyrýdyń qomaqty bóligi mamandandyrylǵan statsıonarlyq kómek kórsetýge jáne joǵary tehnologııalyq otalarǵa jumsalady. Medıtsınalyq mekemelerde bıyl 5 aıda 105 522 naýqas statsıonarlyq jaǵdaıda emdelgen. Onyń 86 myńnan astamy MÁMS-tiń múmkindigin paıdalandy. 16 myńnan astam naýqas kúndizgi statsıonarda em qabyldaǵan. MÁMS júıesi sheńberinde 385 mln teńge qarajatqa 61 joǵary tehnologııaly medıtsınalyq qyzmet kórsetilgen. Kardıohırýrgııa men neırohırýrgııa salalaryndaǵy mundaı otalardyń quny birneshe mıllıonnan bastap 10 mıllıon teńgege deıin jetedi. Jalpy, bıyl qymbat baǵaly ári kúrdeli 144 otany qarjylandyrý josparlanǵan, - dedi fılıal dırektory Jaqsylyq Ábdýsámetov.

Búginde Qyzylorda oblysynda 686 myńnan astam adamnyń «saqtandyrylǵan» mártebesi bar. Bul – óńir turǵyndarynyń 83,3%-y. Al saqtandyrý mártebesi joq 137,5 myńnan astam adamnyń 40,5 myńnan kóbi áleýmettik osal topqa jatady.

Buǵan deıin habarlaǵanymyzdaı, Qyzylorda qalasynda tize jáne jambas býyndaryn almastyrý boıynsha patsıentter hırýrgııalyq aralasýdan bastap medıtsınalyq ońaltýǵa deıingi em-domdy tegin ala alady. Mundaı jaǵdaı MÁMS júıesi arqyly saqtandyrylǵan adamdar úshin qarastyrylǵan.