MÁMS-ke memleket jarnalary 5 paıyzǵa deıin jetkiziledi - DSM

ASTANA. KAZINFORM – MÁMS-ke memleket jarnalarynyń mólsherin birtindep arttyrý eskerilgen. Bul týraly Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» zań jobasyn talqylaý kezinde Densaýlyq saqtaý mınıstri Aqmaral Álnazarova málim etti.

- Eńbek jáne halyqty áleýmettik qorǵaý mınıstrligi Áleýmettik medıtsınalyq saqtandyrý qory jáne jergilikti atqarýshy organdarymen birlesip, óńirler boıynsha aqparattyq júıelerde saqtandyrý mártebesin alýǵa quqyǵy bar jáne medıtsınalyq qyzmetter alǵan adamdardyń tizimin qalyptastyryp, jarna tóleýdi qamtamasyz etý joldaryn pysyqtady. Osy oraıda «D» jáne «E» sanattary úshin jergilikti atqarýshy organdardyń esepteýiniń biryńǵaı obektisine toqtalyp óteıin. Óńirlerde ortasha aılyq jalaqy deńgeıiniń aıtarlyqtaı aıyrmashylyǵy bar. Mysaly, 2023 jyly Atyraý oblysy boıynsha ortasha aılyq jalaqy mólsheri 557 736 teńgeni qurasa, Soltústik Qazaqstan oblysy boıynsha 237 538 teńgeni qurady. Biryńǵaı respýblıkalyq ortasha aılyq jalaqy mólsherin qoldaný naqty kórinistiń burmalaýyna ákeledi dep esepteımiz. Bul jalaqysy tómen óńirlerde jergilikti bıýdjetterdiń artyq mindettemelerine, al ekonomıkasy joǵary deńgeıdegi óńirlerde tómen júktemege ákelýi múmkin. Osy jaǵdaı qarjylyq júktemeni bólýdiń obektıvtiligi men tepe-teńdik qaǵıdattaryn buzady. Osyǵan baılanysty óńirlik ortasha aılyq jalaqyny paıdalaný ádisi jergilikti halyqtyń ómir súrý jáne tabys deńgeıin dálirek eskerýge múmkindik beredi, - dedi A. Álnazarova.

Onyń aıtýynsha, 2027 jyldan bastap respýblıkalyq bıýdjet qarajaty esebinen tólenetin memlekettiń MÁMS-ke jarnalarynyń mólsherlemelerin birtindep arttyrý kózdelgen. Osylaısha, 2015 jylǵy MÁMS týraly zańynyń birinshi redaktsııasynda qarastyrylǵan bastapqy qarjylyq úlgige ishinara qaıta oralý usynylady. Búgin Májiliste qaralyp otyrǵan zań jobasynda memlekettik jarnalardyń mólsherlemelerin 2027 jyldan bastap 2037 jylǵa deıin kezeń-kezeńimen 3 paıyzǵa (ár eki jyl saıyn 0,5%-dan) arttyrý kózdelgen, ıaǵnı 2 paıyzdan 5 paıyzǵa deıin. Qosymsha jınaqtalǵan qarajat densaýlyq saqtaý júıesiniń shyǵyndaryn MÁMS júıesi arqyly belgili bir deńgeıde qarjylandyrýdy qamtamasyz etedi.

- Onyń jyl saıyn ósirýdiń basty sebepterine toqtalsaq, halyq sanynyń 10 paıyzǵa ósýin, onyń ishinde qarttar sanynyń artýyn (2018-2023 jj.) atap ótken jón, - dedi mınıstr.

Budan buryn habarlanǵandaı, 2026 jyly MÁMS júıesimen qosymsha 1 mln-nan astam adam qamtylady. 

Jaqynda MÁMS júıesinen tys qalǵan 3,3 mln adamnyń máselesi qalaı sheshiletinin jazǵan edik.