MÁMS: Qazaqstandyqtar 246,9 mlrd teńge jarna aýdardy

NUR-SULTAN. QazAqparat - 2019 jyldyń 1-31 jeltoqsany aralyǵynda «Áleýmettik medıtsınalyq saqtandyrý qoryna» 12,6 mlrd teńge tústi. Bul týraly qordyń Jurtshylyqpen baılanys departamentinen málim etti, dep habarlaıdy QazAqparat.

«Al júıe iske qosylǵan 2017 jyldyń 1 shildesi men 2019 jyldyń 31 jeltoqsany aralyǵynda jumys berýshiler men jekemenshik kásipkerlerden mindetti áleýmettik medıtsınalyq saqtandyrýǵa (MÁMS) túsken aýdarymdar men jarnalardyń jalpy somasy 246,9 mlrd teńgeni qurady. Onyń 237,7 mlrd teńgesi (96,3%) jumys berýshilerdiń aýdarymdary bolsa, qalǵan 9,2 mlrd teńge (3,7% jýyǵy) – jeke kásipkerler men azamattyq-quqyqtyq kelisimshart negizinde eńbek etetin tulǵalarǵa tıesili», - delingen aqparatta.

Aımaqtyq turǵydan alǵanda, jarna tóleý jaǵynan burynǵysha Almaty, Nur-Sultan qalalary men Qaraǵandy oblysy kósh bastap tur.

Atap ótilgendeı, jınaqtalǵan qarjy Ulttyq bankte saqtalady.

«Bolashaqta MÁMS paketi sheńberindegi qyzmetter aqysyn tóleýge jumsalady. Elimizdiń bas bankimen qarjyny senimgerlik basqarý týraly kelisim bekitilgen», - dedi «Áleýmettik medıtsınalyq saqtandyrý qory» KEAQ Jurtshylyqpen baılanys departamentinen.