MÁMS: Qazaqstandyqtar 1 sáýirge deıin óz mártebesin anyqtaýy tıis

ALMATY. QazAqparat – Qazaqstandyqtar 1 sáýirge deıin mindetti áleýmettik medıtsınalyq saqtandyrý (MÁMS) júıesindegi óz mártebesin anyqtaýy tıis. Bul týraly Óńirlik kommýnıkatsııalar qyzmetinde ótken baspasóz máslıhatynda qalalyq Qoǵamdyq densaýlyq saqtaý basqarmasynyń basshysy Tileýhan Ábildaev aıtty, dep habarlaıdy QazAqparat tilshisi.

«Osy ýaqytqa deıin eldegi barlyq turǵyndar MÁMS aıasynda mártebesine qaramastan medıtsınalyq kómek ala alatyn. Al 1 sáýirden bastap bul qyzmetti tolyq kólemde alý úshin saqtandyrý jasaý kerek», - dedi T.Ábildaev.

Brıfıng barysynda Almatyda 48 myń adam ózin-ózi jumyspen qamtyp otyrǵany aıtyldy. Bul sanat úshin medıtsınalyq saqtandyrýdyń 2 túri qarastyrylǵan.

«Búginde olar eń tómengi jalaqynyń 5 paıyzyn (2125 teńge aıyna) tólese bolady. Nemese biryńǵaı jınaqtyq tólem aýdarsa jetkilikti. ıAǵnı ol qala turǵyndaryna 1 AEK-ti (2651 teńge) qurasa, aýyl turǵyndary úshin 0,5 AEK (1326 teńge)», — dedi ol.

Qazaqstandyqtar MÁMS salymyn «Qazposhta» AQ bólimsheleri, 25 ekinshi deńgeıli bank jáne 7 ınternet-bankıng portaly arqyly tóleı alady.

Tutynýshylar medıtsınalyq mekemege barmas buryn óz mártebesin e-gov portalyndaǵy Telegram-bottyń kómegimen nemese QR Densaýlyq saqtaý mınıstrligi men Áleýmettik medıtsınalyq saqtandyrý qorynyń resmı saıttaryndaǵy siltemelerge ótý arqyly bile alady.