MÁMS qarjysyn eń kóp ıgergen óńirler belgili boldy

ASTANA. QazAqparat – «Áleýmettik medıtsınalyq saqtandyrý qory» kommertsııalyq emes aktsıonerlik qoǵamynyń basqarma tóraǵasy Sábıt Ahmetov redaktsııa saýalyna joldaǵan jaýabynda MÁMS aqshasyn eń kóp ıgergen óńirlerdi atady, dep habarlaıdy QazAqparat tilshisi.

«2022 jyly Áleýmettik medıtsınalyq saqtandyrý qorynyń jetkizýshileri halyqqa MÁMS aıasynda 156 mıllıonǵa jýyq medıtsınalyq qyzmet kórsetti. Eń kóp qyzmet Túrkistan oblysynda kórsetilgen - 16,5 mln. Sondaı-aq, Almaty oblysynda — 15,7 mln, Astanada — 14,7 mln jáne Almaty oblysynda – 13,9 mln medıtsınalyq qyzmet kórsetilgen», - dep jazylǵan jaýapta.

Qor 2022 jyly MÁMS aıasynda kórsetilgen qyzmetterdiń aqysyna 836 mlrd teńge tólegen.

«Onyń ishinde Almaty qalasy boıynsha – 117,3 mlrd teńge, Astana qalasy boıynsha – 110 mlrd teńge, Túrkistan oblysy boıynsha – 79,9 mlrd teńge, Almaty oblysy boıynsha – 65,9 mlrd teńge tólendi.

Tutynylatyn medıtsınalyq qyzmetterdiń arasynda ambýlatorııalyq jaǵdaıda konsýltatsııalyq-dıagnostıkalyq kómek alýdyń úlesi zor – 141,3 mln qyzmet.

Medıtsınalyq oǵaltý baǵytynda 8,9 mln qyzmet kórsetildi. Onyń 6 mıllıony ambýlatorııalyq-emhana jaǵdaıynda usynyldy.

Statsıonar jaǵdaıyndaǵy mamandandyrylǵan medıtsınalyq kómek baǵytynda 3,4 mln qyzmet kórsetildi. Onyń ishinde 1,9 mln qyzmet qabyldaý bólimderinde usynyldy», - dep jazady Sábıt Ahmetov.