MÁMS: Qarashada Nur-Sultan qalasy boıynsha 3,7 mlrd teńgege jýyq jarna tústi
NUR-SULTAN. QazAqparat – Bıylǵy jyldyń qarasha aıynda elordalyqtar medıtsınalyq saqtandyrýǵa 3,7 mlrd teńgege jýyq jarna aýdardy, dep habarlaıdy QazAqparat «Áleýmettik medıtsınalyq saqtandyrý qory» KEAQ Nur-Sultan qalasy boıynsha fılıalynyń baspasóz qyzmetine silteme jasap.
Al, jyl basynan beri, ıaǵnı 2021 jyldyń qańtar-qarasha aılary aralyǵynda MÁMS úshin Nur-Sultan qalasy boıynsha 37,7 mlrd teńgeden asa jarna aýdarymdary túsken.
Nur-Sultan qalasy boıynsha 2017 jyldyń 1 shildesi men 2021 jyldyń 30 qarashasy aralyǵynda medıtsınalyq saqtandyrý úshin jınaqtalǵan jarnanyń jalpy somasy 95,8 mlrd teńgeden asa somany qurady.
«2021 jyldyń qarasha aıynda medıtsınalyq saqtandyrý úshin elordalyqtar 3,7 mlrd teńgege jýyq jarna aýdarǵan. Onyń ishinde jumys berýshilerdiń aýdarymdary – 1,73 mlrd teńge, al jeke kásipkerlerden túsken jarna – 1,94 mlrd teńge. Osy aralyqta biryńǵaı jıyntyq tólem (BJT) boıynsha aýdarylǵan MÁMS jarnalary 9,3 mln. teńgege jýyq somany quraıdy.
Mindetti áleýmettik medıtsınalyq saqtandyrý úshin túsken barlyq jarna aýdarymdary, ıaǵnı jınaqtalǵan qarjy, senimgerlik basqarý týraly jasalǵan kelisimshartqa sáıkes, Ulttyq bankte saqtalady da, medıtsınalyq qyzmetter aqysyn tóleýge jumsalady. TMKKK jáne MÁMS paketteri boıynsha halyqqa kórsetilgen medıtsınalyq qyzmetterdiń sapasy men kólemine monıtorıng jasap, teksergennen keıin ǵana Qor jetkizýshilerine tólem júrgiziledi», - deıdi «Áleýmettik medıtsınalyq saqtandyrý qory» KEAQ Nur-Sultan qalasy boıynsha fılıalynyń dırektory Nurlybek Qabdyqaparov.
