MÁMS: qant dıabetine shaldyqqandar qanshalyqty saqtandyrylǵan

ASTANA. KAZINFORM – QR Densaýlyq saqtaý mınıstrligi MÁMS júıesin jetildirý jáne taldaý departamentiniń dırektory Lázzat Shomanova qant dıabetine shaldyqqan naýqastardyń máselesine túsinik berdi.

- Olardyń 95 paıyzynda saqtandyrylǵan mártebesi bar. Qalǵan 1,5 myń adamnyń saqtandyrý mártebesi joq. Eger osy adamdar jumys istese, onda jarna tóleýi kerek. Jumyssyz bolsa, eńbek bırjasynda jumyssyz retinde tirkelip, jeńildik alatyn sanatqa kirýi kerek. Sonymen qatar, olar áleýmettik ál-aýqattyń daǵdarystyq (D) jáne tómen (E) deńgeılerine jatsa, óz sanattaryn anyqtap alǵany jón. Bul turǵyda 2026 jyly bolatyn ózgeristerge daıyndalýy tıis, - dedi L. Shomanova.

Buǵan deıin mınıstrlik qant dıabeti áleýmettik máni bar aýrý retinde qarastyryla beretinin habarlady.

Atap aıtqanda, qant dıabetimen aýyratyn qazaqstandyqtar MÁMS júıesinde qosymsha jarna tólemeıdi.

- Halyqaralyq praktıkany eskere otyryp jáne terapııany keńeıtý maqsatynda ony qarjylandyrý MÁMS paketine aýystyryldy. Bul sheshim patsıentterdi qorǵaý deńgeıin tómendetpeıdi, kerisinshe qarjylandyrýdyń turaqtylyǵyn nyǵaıtady jáne densaýlyq saqtaý qyzmetteriniń aýqymyn, sonyń ishinde sońǵy emdeý ádisterin keńeıtýge múmkindik beredi, - dep atap ótilgen Densaýlyq saqtaý mınıstrligi málimetinde.

Aıta keteıik, 2026 jyly MÁMS júıesinde qosymsha bir mln-nan astam adam qamtylady.

Bıyl kóktemde qant dıabetine shaldyqqandar sany úzdiksiz artyp jatqanyn jazǵan edik.