MÁMS esebinen júrgiziletin eń kúrdeli ári qymbat TOP-10 operatsııa

ASTANA. KAZINFORM – Densaýlyq saqtaý mınıstrligi MÁMS esebinen júrgiziletin eń kúrdeli ári qymbat on operatsııany atap ótti.

Aı saıyn MÁMS qarajaty esebinen saqtandyrylǵan qazaqstandyqtarǵa joǵary tehnologııalardy qoldana otyryp, birneshe myń qymbat operatsııa jasalady. Mundaı medıtsınalyq qyzmetterdiń quny 1 mln teńgeden 10 mln teńgege deıin jetedi.

Biz 2025 jyldyń qyrkúıek-jeltoqsan aılary aralyǵynda qazaqstandyq dárigerler júrgizgen eń kúrdeli ári qymbat 10 operatsııany jınaqtadyq.

Oral qalasynda patsıentke kardıoverter-defıbrıllıator ornatylyp, ómiri saqtaldy

Nıkolaı Makrýshın uzaq jyldar boıy júrek soǵysynyń kúrt ózgerýinen zardap shekken: birde pýlsi mınýtyna 160-qa deıin kóterilse, birde 40-qa deıin tómendegen. «Júregim keýdemnen shyǵyp ketetindeı bolatyn, aptasyna úsh ret jedel járdem shaqyratynmyn», – dep eske alady ol.
Batys Qazaqstan oblystyq kardıologııalyq ortalyǵynda oǵan qarynshalardyń jumysyn sınhrondaıtyn jáne kenetten bolatyn ólimnen qorǵaıtyn úsh kameraly kardıoverter-defıbrıllıator ornatyldy. Kardıohırýrg Talǵat Serikulynyń aıtýynsha, bul qurylǵy sozylmaly júrek jetkiliksizdigi bar patsıentter úshin asa mańyzdy.
Operatsııadan keıin arıtmııa ustamalary toqtap, Nıkolaı ózin jaqsy sezine bastady. Barlyq medıtsınalyq kómek MÁMS boıynsha tegin kórsetildi.

Taldyqorǵanda jambas býynynyń eski endoprotezi aýystyryldy

31 jastaǵy patsıent oblystyq aýrýhanaǵa 18 jyl buryn ornatylǵan endoprotezden keıingi asqynýlarmen júgingen. Hırýrgter revızııalyq endoprotezdeý jasap, eski protezdi býynnyń turaqtylyǵy men uzaq qyzmetin qamtamasyz etetin zamanaýı protezge aýystyrdy.
Revızııalyq endoprotezdeý – eń kúrdeli operatsııalardyń biri. Qazirgi ýaqytta patsıent josparly ońaltýdan ótip, jaǵdaıy jaqsy. Operatsııa men ońaltý MÁMS esebinen qamtamasyz etildi.

Qaraǵandyda synǵan omyrtqa qalpyna keltirildi

73 jastaǵy er adam úıinde qulap, bel omyrtqasy kompressııalyq synǵan. №1 kópbeıindi aýrýhanada oǵan teri arqyly vertebroplastıka jasalyp, zaqymdanǵan omyrtqalarǵa súıek tsementi engizildi.
Bólim meńgerýshisi Ǵalymbek Saılaýuly: «Mundaı operatsııalar omyrtqanyń tirek qyzmetin tez qalpyna keltirýge múmkindik beredi. Birneshe kúnnen keıin patsıent tura alady», – dep atap ótti. Emdeý MÁMS esebinen tolyq tólendi.

Tarazda balaǵa plagıotsefalııa boıynsha alǵash ret operatsııa jasaldy

Bir jasar Batyrhanǵa týa bitken bas súıek deformatsııasy dıagnozy qoıyldy. Dárigerler arnaıy plastınalardy qoldana otyryp, tórt saǵattyq rekonstrýktıvti operatsııa júrgizdi. Neırohırýrg Mırdas Mýradovtyń aıtýynsha, buǵan deıin mundaı operatsııalar tek Almaty men Astanada jasalatyn.
Operatsııadan keıin bala belsendirek bolyp, alǵashqy qadamdaryn jasap, alǵashqy sózderin aıta bastady. Operatsııa MÁMS sheńberinde júrgizildi. Qymbat joǵary tehnologııaly kómektiń óńir balalaryna qoljetimdi bolǵany qýantady.

Qazaqstanda alǵash ret aýdandyq aýrýhanada arıtmologııalyq operatsııalar jasala bastady

Elimizdegi aýdandyq aýrýhanalar arasynda alǵash ret Qyzylorda oblysynyń Qazaly kópbeıindi aýdandyq ortalyq aýrýhanasynda joǵary tehnologııaly arıtmologııalyq operatsııalar oryndaldy. Alǵashqy patsıentterdiń qatarynda 67 jastaǵy Keńes Jalmaǵambetov pen 65 jastaǵy Ýrzada Ábdimálikqyzy bar.

Uzaq jyldar boıy júrek yrǵaǵynyń buzylýynan zardap shekken patsıentterge elektrokardıostımýlıatorlar sátti ımplantattalyp, júrek yrǵaǵy qalypqa keldi. Angıografııalyq jabdyqty qoldana otyryp, mamandar jeti operatsııa jasady, onyń ishinde kardıostımýlıatordy ımplantattaý, radıojıilikti ablıatsııa jáne ókpe venalarynyń krıoablıatsııasy bar. 

– Radıojıilikti ablıatsııanyń quny 7 mln teńgege deıin jetedi, alaıda saqtandyrylǵan patsıentter úshin ol tolyqtaı tegin, – dedi arıtmolog Qanat Aldabergenuly.

Dárigerlerdiń aıtýynsha, mundaı aralasýlar ınsýlt pen ınfarkt qaýpin edáýir tómendetedi jáne endi aýdan deńgeıinde turaqty túrde MÁMS sheńberinde júrgiziledi.

Shymkentte búırekti transplantattaý jas patsıentti ómirge qaıta oraltty

23 jastaǵy er adam aýyr búırek jetkiliksizdigine shaldyǵyp, gemodıalızde bolǵan. Donor – onyń týǵan ápkesi. Operatsııa 3,5 saǵatqa sozylyp, kúrdeli qarsy kórsetilimderge qaramastan sátti ótti. Qazirgi ýaqytta patsıent qalpyna kelip, qalypty ómirge oralýda.
Shymkentte jalpy sany 240 búırekti transplantattaý jasalǵan, barlyq operatsııalar MÁMS esebinen tólengen. Ár operatsııanyń quny shamamen 6,5 mln teńge.

Almaty oblysynda estý qabileti qalpyna keltirildi

1962 jyly týǵan patsıent qulaqtan iriń aǵýymen jáne estý qabiletiniń tómendeýimen aýyrǵan. Kópbeıindi klınıkalyq aýrýhanada oǵan dabyl jarǵaǵyn qaıta qaraýmen tımpanoplastıka jasalyp, estýi 52 dB-den 22 dB-ge deıin jaqsardy.

Bólim meńgerýshisi Ásel Imanǵalıeva «Patsıent alǵashqy aptalardyń ózinde estý qabiletiniń aıtarlyqtaı jaqsarǵanyn baıqady», – dedi. Emdeý MÁMS sheńberinde júrgizildi.

Almatyda ınsýlt alǵan patsıenttiń ómiri jasandy ıntellektiniń kómegimen saqtalyp qaldy

77 jastaǵy er adamda ıshemııalyq ınsýlttan keıin tromb jedel túrde alynyp tastaldy. Bul rette RAPID jasandy ıntellekt júıesi qoldanylyp, mıdyń zaqymdaný deńgeıin baǵalaýǵa jáne aralasý kórsetkishterin anyqtaýǵa múmkindik berdi. Birneshe kúnnen keıin patsıent turyp, birtindep qalpyna kele bastady.

Neırohırýrg Aıbek Turalıev «Ýaqytyly aralasý men jasandy ıntellekt tolyq saýyǵý múmkindigin arttyrady, – dep atap ótti. Emdeý MÁMS esebinen tolyq tegin kórsetildi.

Beıneýde laparoskopııalyq operatsııalar qoljetimdi boldy

1957 jyly týǵan patsıentke ót qabyndaǵy tas laparoskopııalyq ádispen alyndy. Operatsııa sátti ótip, jaǵdaıy turaqty.
Buryn mundaı operatsııalar úshin oblys ortalyǵyna barý qajet bolatyn. Qazir Mańǵystaý oblysynyń aýyl turǵyndary zamanaýı hırýrgııalyq kómekti óz óńirinde, MÁMS sheńberinde tegin ala alady.

Pavlodarda qan quıylýdan keıin kórý qabileti qalpyna keltirildi

Qant dıabetiniń asqynýymen túsken patsıent kózge úsh operatsııa jasatty. Úshinshi operatsııadan keıin kórý qabileti 40%-ǵa deıin jaqsardy, al buǵan deıin múlde kórmegen.

Bas oftalmolog Qasymhan Tileýbaevtyń aıtýynsha, buryn mundaı patsıentter «altyn ýaqytty» joǵaltyp, shetelge nemese respýblıkalyq ortalyqtarǵa barýǵa májbúr bolatyn. Búginde joǵary tehnologııaly kómek jergilikti jerde kórsetilip, MÁMS esebinen qamtamasyz etilip jatyr.

Eske sala keteıik, Balaeva keler jyly MÁMS júıesinde ne ózgeretinin aıtty.