MÁMS densaýlyq saqtaý salasynyń negizgi qarjylandyrý kózine aınalady
ASTANA. KAZINFORM — 2027 jyly MÁMS qarajaty densaýlyq saqtaý salasynyń negizgi qarjylandyrý kózine aınalady. Bul týraly búgin Úkimet otyrysynda Densaýlyq saqtaý mınıstri Aqmaral Álnazarova aıtty.
— Saqtandyrý modelin engizý Qazaqstannyń densaýlyq saqtaý salasy jalpy shyǵystarynyń ulǵaıýyna serpin berdi. MÁMS iske qosylǵannan keıin salalyq qarjylandyrýdyń ortasha jyldyq qarqyny 2 eseden artyq ósip, 21,2 paıyzdy qurady. Bul ınvestıtsııalardyń, onyń ishinde jeke ınvestıtsııalardyń kelýin yntalandyrdy. Memleket basshysynyń tapsyrmasy boıynsha saqtandyrý modeli júıesinde jumys isteıtin elderdiń úzdik tájirıbelerin eskere otyryp, tegin medıtsınalyq kómektiń kepildik berilgen kólemi men MÁMS paketterin qaıta retteý júrgizildi. 2027 jylǵa qaraı MÁMS qarajaty sala shyǵystarynyń negizgi qarjylandyrý kózine aınalady, — dedi mınıstr.
Onyń atap ótýinshe, salany qarjylandyrýdy ulǵaıtý halyq úshin medıtsınalyq qyzmetterdiń qoljetimdiligin arttyrdy jáne medıtsına qyzmetkerleriniń eńbek jaǵdaıyn jaqsartýǵa tikeleı áser etedi. Máselen, sońǵy 7 jylda 1 adamǵa arnalǵan medıtsınalyq shyǵystar 98 myń teńgeden 258 myń teńgege deıin, ıaǵnı 2,6 esege ulǵaıdy.
— Bul rette medıtsına personalynyń ortasha jalaqysy shamamen 2,5 ese, onyń ishinde dárigerlerdiń jalaqysy 2,8 ese — 159 myńnan 442 myń teńgege deıin ulǵaıdy. Bastapqy deńgeıde kórsetiletin qyzmetter jáne konsýltatsııalyq-dıagnostıkalyq qyzmetter sany 2,7 ese artty. Áleýmettik medıtsınalyq saqtandyrý júıesiniń «tabysty adamnyń osal topqa járdemi» negizgi qaǵıdatyn júzege asyrý júıeniń basty jetistikteriniń biri boldy. Bul áleýmettik ádildiktiń tıisti deńgeıin jáne medıtsınalyq kómektiń jalpyǵa birdeı qol jetkizýin qamtamasyz etýge múmkindik berdi, — dedi Aqmaral Álnazarova.
Buǵan deıin 2026 jyly MÁMS derekterin beretin memlekettik organdardyń tizimi jańartylatynyn jazǵan edik.