MÁMS boıynsha tis emdeýde birqatar jeńildikter qarastyrylǵan

TARAZ. QazAqparat – Búginde belgili bir sanattaǵy azamattar stomatologııalyq kómekke eldegi kez kelgen emdeý uıymy arqyly qol jetkize alady desek, odan turǵyndardyń deni beıhabar. Bul týraly Jambyl oblystyq stomatologııalyq emhanasynyń bas dárigeri Aqylbek Úsenbaev aıtyp berdi, dep habarlaıdy QazAqparat tilshisi.

Tis emdeý boıynsha atalǵan jeńildikke jyl basynan beri engizilgen mindetti áleýmettik medıtsınalyq saqtandyrý júıesi múmkindik berip otyr. Jambyl oblystyq stomatologııalyq emhanasynyń bas dárigeri Aqylbek Úsenbaevtyń aıtýynsha, bul oraıda aıryqsha mán beretin nárse - saqtandyrý engizilgenge deıin stomatologııalyq kómek tek patsıenttiń tirkelgen emhanasy arqyly ǵana kórsetilip kelse, jańa júıeniń arqasynda atalǵan sanattaǵy azamattar bul qyzmetti elimizdiń kez kelgen jerinde paıdalana alady.

«Júıe boıynsha josparly stomatologııalyq kómek 18 jasqa deıingi balalar men júkti áıelderge kórsetiledi. Al shuǵyl stomatologııalyq kómekti atalǵan eki sanatqa qosa Uly Otan soǵysynyń ardagerleri, 1, 2, 3-toptaǵy múgedekter, «Altyn alqa», «Kúmis alqasy» bar kópbalaly analar, ataýly áleýmettik kómek alýshylar, zeınetkerler, áleýmettik máni bar aýrýlarmen aýyratyndar, múgedek balaǵa kútim jasaıtyn jumys istemeıtin adamdar, bala kezinen birinshi toptaǵy múgedekke kútim jasaıtyn, jumys istemeıtin adamdar alady»,-deıdi bas dáriger.

Atalǵan sanattaǵy adamdarǵa hırýrgtiń qabyldaýy, tisti julý, abstsesti ashyp tazartý, odontegendi isikti kesip alyp tastaý, alveolıtti emdeý, tis tamyry nevrıtin emdeý, aýyz qýysyndaǵy jumsaq tinderdi kesip alyp tastaý, jaq-bet súıegindegi jaralardy emdeý taǵy basqa qyzmetter tegin.

Sondaı-aq, jaq-bet súıegi aqaýymen týǵan nárestelerge arnalǵan ortodontııalyq kómek túrleri de memlekettik tapsyrys sheńberinde tegin kórsetiledi.

«Bıyl áleýmettik medıtsınalyq saqtandyrý qory MÁMS paketi boıynsha áleýmettik qorǵalmaǵan otbasylardan shyqqan balalardy, ıaǵnı ataýly áleýmettik kómek alýshylardy qoldaý bastaldy. Qazir bul týraly oblys turǵyndary, ásirese aýyldyqtar asa bile bermeıtin sekildi. Ol boıynsha 6-dan 12 jasqa deıingi balalarǵa túrli jaqsúıek-bet aımaǵynyń aýytqýlary kezinde ortodontııalyq kómek kórsetiletin bolady, ıaǵnı, tisin túzetetin plastık kıgiziledi»,- deıdi Aqylbek Úsenbaev.

Emhananyń bas dárigeri turǵyndardy óz jemisin bere bastaǵan jańa júıedegi jaqsy jańalyqtar týraly barynsha habardar bolyp, ondaǵy múmkindikter men jeńildikterdi tıimdi paıdalanýǵa shaqyrdy.