MÁMS boıynsha naýqastyń suraǵan qyzmetine joq deýge bolmaıdy - vıtse-mınıstr
QR Densaýlyq saqtaý vıtse-mınıstri Qamaljan Nadyrov jáne mınıstrliktiń ınvestıtsııalyq saıasat departamentiniń dırektory Aslan Kınaıatov bastaǵan aımaqtyń shtab músheleri úshinshi megapolıste kórsetilip jatqan medıtsınalyq qyzmetterdiń jan-jaqtylyǵyn, tolyqtyǵyn qaraý maqsatynda birqatar medıtsınalyq mekemelerdi aralap shyqty.
Jumysshy top ókilderi qaladaǵy №8 jáne №13 emhanalardy aralap, tirkeý bóliminiń jumysy arqyly patsıentterdiń mártebesin jáne saqtandyrylǵany jóninde aqparatty tekserip kórdi. Jumys toby naýqastar úshin beıindi mamandar qyzmetiniń qanshalyqty qoljetimdi ekenin biryńǵaı KMIS mobıldi qosymsha júıesi arqyly tekserdi.
Sondaı-aq, kardıologııalyq ortalyqtyń jumysymen tanysqan top músheleri naýqastarmen tildesti. Ortalyqtyń dırektory Ermaǵanbet Qýatbaevtyń sózinshe, saqtandyrý júıesi boıynsha ortalyqqa shuǵyl jaǵdaıda jetkiziletin patsıentterge kómek kórsetýde eshqandaı kedergiler joq. Sebebi jańa júıe boıynsha naýqastarǵa jedel kómek kórsetý burynǵysha tegin medıtsınalyq kómektiń kepildik berilgen kóleminiń sheńberi negizinde kórsetiledi. Sonymen qatar jumysshy top músheleri qalalyq ákimdikte ótken jıynǵa qatysty. Májiliste sóz alǵan QR Densaýlyq saqtaý vıtse-mınıstri Kamaljan Talǵatuly qalanyń medıtsınalyq uıymdary jańa júıe boıynsha jumys isteýge daıyn ekenderine kóz jetkizgenin atap ótti. Sala mamandaryna naýqastar úshin kez-kelgen qyzmet qol jetimdi bolý qajettigin tilge tıek etti.
«Aǵymdaǵy jyldyń birinshi sáýirine deıin kez-kelgen patsıenttiń mártebesi shartty túrde saqtandyrylǵan. Sondyqtan medıtsına mamandary MÁMS boıynsha naýqastardyń suraǵan qyzmetterine joq deýge bolmaıdy. Qandaı jaǵdaı bolmasyn patsıenttiń paıdasyna sheshilýi tıis. Sondaı-aq kz-kelgen turǵyn 1406-nómiri arqyly táýlik boıy saqtandyrý qorynyń koll ortalyǵyna habarlasýlaryna bolady. Jalpy MÁMS boıynsha naýqastyń suraǵan qyzmetine joq deýge bolmaıdy», -dedi Qamaljan Nadyrov.
Aıta keteıik, mindetti áleýmettik medıtsınalyq saqtandyrý júıesi boıynsha qalanyń densaýlyq saqtaý salasyna bólingen qarjy kólemi 35 paıyzǵa artyp otyr.Nátıjesinde naýqastarǵa qol jetimdi medıtsınalyq qyzmetter sany kóbeıip, medıtsınalyq uıymdarda reabılıtatsııalyq qyzmet kórsetetin 600-den asa tósek orynǵa ashyldy. 7 uıymda sıtýatsııalyq ortalyq ashylyp, onyń jumysy biryńǵaı júıe arqyly jumys isteýge múmkindik beredi.
Aınur Aqbaeva